Volkswagen is ’n konserwatiewe motormaatskappy wat die kat eers nege keer uit die boom kyk voordat hy hom optel om te streel. Dis ’n maatskappy getrou aan evolusie, nie revolusie nie.

Waar ander maatskappye met oorgawe die neiging na sportnutsvoertuie omhels het deur elke moontlike nis met ’n sportnuts te probeer toestop, het Volkswagen dinge die afgelope 20 jaar versigtig en stapsgewys aangepak.

Die groot, luukse Touareg was in 2002 dié motorreus se eerste ordentlike sportnutsvoertuig, waarna die middelslag-, gesinsvriendelike Tiguan in 2007 sy verskyning gemaak het.

Ondanks die feit dat die Tiguan relatief vinnig Volkswagen se topverkoper geword het en die mark vir kleiner sportnutsvoertuie in die algemeen ontplof het, het die klein T-Cross eers in 2019 sy opwagting gemaak.

Hierdie drie Duitse musketiers en hulle hegte verbintenis met mekaar het wel sin gemaak.

Die T-Cross is gemik op ’n jong gesin wat ’n intreevlak-sportnuts soek. Sodra die kinders begin skoolgaan, kan die gesin opgradeer na die Tiguan. En daarna, as die bankbalans soos die kinders ook mooi grootgeword het, wag die grote Touareg.

Met die eerste oogopslag het die bekendstelling van die T-Roc in 2020, skaars ’n paar maande na die T-Cross, hierdie Duitse sprokie lelik deurmekaargekrap.

Die T-Roc is omtrent net so groot soos die “kleiner” T-Cross, maar kos amper dieselfde as die groter en meer praktiese Tiguan.

Party mense sal sê die sokkies wat Volkswagen se boontjietellers gerook het die dag toe hulle die T-Roc goedgekeur het, was gestop met aaptwak. Toe nie. Hierdie vierde musketier is meer as net ’n pierewaaier.

Soos ’n d’Artagnan van ouds is die T-Roc ’n formidabele swaardvegter op die pad.

Dink daaraan as ’n groter en hoër weergawe van die Golf, ’n kragtige en stylvolle motor gelaai met luukse toebehore eerder as ’n praktiese sportnuts vir die gesin.

In Suid-Afrika kan jy kies tussen twee petrolturbo-aangejaagde enjins – ’n 1.4-liter en die 2.0-liter enjin wat ook in die GTI gevind word.

Daar is ’n magdom kleur-opsies en -kombinasies om mee te speel. Jou bakwerk kan een van agt kleure wees, en jou dak een van vier.

Al dra julle dieselfde soort Guess-jeans, hoef jou T-Roc nie soos jou buurman s’n te lyk nie!

Die duurste model is die R-Line wat opgedollie is met LED-ligte, 19-duim allooiwielvellings, ’n hipermoderne binneruim en Volkswagen se 4Motion-viertrekstelsel wat beteken die motor klou soos klitsgras in draaie. Maar dan gaan draai jy al by amper R600 000!

En al herinner die T-Roc jou aan ’n hoër en wyer Golf, is sy harde plastiekraakoppervlakke byvoorbeeld nie so luuks soos dit wat jy in ’n GTI gaan vind nie.

Die T-Roc is dus nie vis of vlees nie; nie ’n luikrug nie, maar ook nie heeltemal ’n sportnuts nie.

Tog het Volkswagen dit reggekry om ’n aar raak te boor, want daar is ’n groeiende mark vir hierdie soort “crossover”-motors.

En die surf & turf-T-Roc is waarskynlik die een op die spyskaart wat jou oog gaan vang.