Dié dubbelkajuitbakkie is merkbaar kleiner as die Amarok, maar het ’n unieke funksie: Die agtersitplekke vou vorentoe sodat daar ’n opening tussen die kajuit en die laaibak geskep word waarin jy items soos branderplanke kan laai.
“Met sy treffende targa-dak, charismatiese vooraansig, driedimensionele LED-strokies agterlangs en sterk lyne is die Tarok-konsep die eerste voertuig wat spog met die stilering van ’n voorstedelike sportnuts én ’n ware veldryvoertuig,” sê Klaus Bischoff, hoofontwerper by Volkswagen.
Die Tarok-konsepvoertuig word aangedryf deur ’n 1,4 l-turboaangejaagde viersilinderenjin wat 110 kW opwek. (Dié enjin voldoen aan Brasilië se behoefte om skoon etanol of ’n etanol-petrol-mengsel te kan ontbrand.)
