Stuur jou vrae gerus na redakteur@weg.co.za.

Edwin Pagel van Windhoek skryf Ek het dié swartrenoster onlangs by die Okaukuejo-watergat in Etosha- nasionale park afgeneem. Het hy drie horings of is dit ’n groot vrat op sy voorkop?

Die wildlewekenner L.D. van Essen antwoord Dis ’n derde horing en dis ’n rare verskynsel. Ek weet wel van ’n swartrenoster met drie horings wat in 2015 in Etosha afgeneem is, en daar is ook rekords van sulke renosters rondom die Young-meer in Zambië en een wat in 1906 by Elmenteita in Kenia geskiet is.

Die derde horing word waarskynlik veroorsaak deur ’n niegenetiese ontwikkelingsafwyking wat ontstaan het toe die renoster ’n fetus was.

Die afwyking sal dus nie na die renoster se nageslag oorgedra word nie. Indien die afwyking geneties was, sou verskeie renosters in die gebied drie horings gehad het.

’n Ander moontlikheid is dat ’n besering tot die derde horing gelei het. Wildsbokke kry dikwels horings op hulle voorkop, gesig of selfs op hulle lyf as gevolg van beserings en dieselfde kan met ’n renoster gebeur.

Die derde horing, ongeag die oorsprong daarvan, sal nie ’n invloed op die lewensgehalte van die dier hê nie.

Theo Mostert van Goodwood skryf Ek het hierdie pragtige spinnekop in die Bontebok- nasionale park afgeneem. Ek vermoed dis ’n wawielwebspinnekop, maar die web is nogal ’n deurmekaarspul. 

Die insekkenner Duncan Macfadyen antwoord Dis ’n swartpoot- gouewawielwebspinnekop (Nephila fenestrata), die kleinste van ons plaaslike spesies.

Dit kom regoor Suid-Afrika voor, buiten die droë sentrale en westelike dele van die land, en is ook die enigste Nephila-spesie in die Wes-Kaap. Die spesie is tans volop as gevolg van die bogemiddelde reënval in sekere dele van die land, en insekte wat ook nou oral uitbroei.

Die wyfie is amper heeltemal swart en die eerste, tweede en vierde pare van haar bene het borselagtige hare. Die buik is roomkleurig of geel met swart of blou kolle.

Jy kan die spesie uitken aan hulle swart bene en die vensterpatroon op die onderkant van die buik – die wetenskaplike naam fenestrata beteken “vensteragtig” in Latyns.

Die web is vol stukkies prooi en blare. Sover ek weet, maak dié spinnekoppe nie sulke goed bymekaar nie; dus moet die wind dit teen die web vasgewaai het.