Gedeeltelike sonsverduistering: Op die namiddag van 14 Desember, net voor sonsondergang, kan die mense in die westelike helfte van Suid-Afrika op die uitkyk wees vir ’n klein “happie” uit die son soos wat die maan voor hom verbybeweeg. Die sonsondergang behoort ’n skitterende foto te lewer (sien tabel onder vir tye).

In plekke soos Kaapstad sal die son nog relatief hoog sit wanneer die verduistering begin, en jy sal aanvanklik ’n spesiale sonsverduisteringbril benodig. Namate die son sak, kan jy die skouspel met die blote oog waarneem.

Die Ster van Bethlehem: Gereelde sterrekykers sou agtergekom het dat Jupiter en Saturnus die laaste paar maande al hoe nader aan mekaar beweeg. Op 21 Desember bereik hulle konjunksie, wat beteken dat dit van die aarde af met die blote oog lyk asof hulle presies “oplyn”. (In werklikheid beweeg hulle eintlik met ’n tiende van ’n graad by mekaar verby.) Die twee planete sal saam as ’n baie helder “ster” vertoon, wat ’n mens – veral so na aan die Kerstyd – aan die Ster van Bethlehem herinner.

Volmaan vir Erfenis: Het jy geweet dat sommige wêrelddele die volmane van spesifieke maande spesiale name gee? Mense in die Noordelike Halfrond verwys na Junie se volmaan as die Strawberry Moon omdat dit gewoonlik saamval met die taamlike kort aarbei-oestyd in die noordooste van die VSA.

Danksy die Centre for Astronomical Heritage gaan Suid-Afrika voortaan sy unieke erfenis met ’n paar volmane kan herdenk: Op 28 Januarie 2021 kan jy opkyk na die Bidsprinkaanvolmaan, gevolg deur die Dassievolmaan op 27 Februarie en die Oesvolmaan op 28 Maart.

Gaan na cfah.org.za/fullmoon vir ’n lys van al 2021 se erfenismane en die inspirasie agter elkeen se naam.

Gedeeltelike sonsverduistering
Gedeeltelike sonsverduistering

SONOP & SONONDER

16 DESEMBER

Kaapstad: 5.30 vm. en 7.54 nm.

Bloemfontein: 5.11 vm. en 7.11 nm.

Johannesburg: 5.10 vm. en 6.57 nm.

Durban: 4.50 vm. en 6.54 nm.

16 JANUARIE

Kaapstad: 5.52 vm. en 8.00 nm.

Bloemfontein: 5.31 vm. en 7.18 nm.

Johannesburg: 5.30 vm. en 7.05 nm.

Durban: 5.11 vm. en 7.01 nm.

Bron: saao.ac.za

Maanfases
Maanfases
Maanfases
Maanfases
Word deel van die Weg-wêreld
Teken in op ons nuusbrief en ontvang elke week lekker leesstories, resepte en inligting oor ons nuutste toere en slypskole in jou inboks. Volg ons op die YouTube-kanaal WegTV (kyk ons nuutste video's eerste!), asook Instagram en Facebook