Meld jou aan by die Bonniedale-vakansieplaas se opstal waar die eienaars, Nico en Danette Hesterman, vir jou ’n roetekaart gee en verduidelik wat op jou wag.

Ry nou 1,7 km terug met die pad waarop jy tot hier gery het, en draai links by die rigtingwyser vir Goliatsberg. Jy is nou by die begin van die Bonniedale-4x4-roete.

’n Tweespoorpad kronkel teen ’n skuinste uit – hier gaan jy laestrek én vastrapbeheer moet aanskakel, want hier is ’n mengsel van kliptrappe en los gruis. Jou trokkie klouter tot by Goliatsberg se uitkykpunt (S33.89218 E21.84895), sowat 700 m bo seespieël. Hier kon jy vroeër jare kies of jy ’n taai hindernisroete dieper die kloof in wil volg of ’n makker pad bergaf neem tot die volgende uitkykpunt.

Maar die taaier roete is deesdae gesluit, hoewel die makker roete steeds ’n uitdaging is met ’n afdraande wat jou twee keer laat dink of jy werklik hier wil afry. Ons voertuig het elektroniese afdraandebeheer en kameras in die voorbuffer gehad, maar as jou trokkie nie sulke affêrings het nie, stel ons voor jy haak laestrek in en hou hom in eerste rat terwyl iemand buite staan en kyk dat jy nie die onderstel teen ’n groot klip beskadig nie.

Hierna is dit ’n rustiger rit tot by die volgende uitkykpunt, die Klipbokberg. Hiervandaan is dit afdraande tot by Bonniedale se plaasopstal van waar jy in ’n klofie tussen die Goliat- en Klipbokberg kan ry tot by die Rotspoel se swemgat.

Die tweede deel van die 4x4-roete begin in die Kammarivier onder Bonniedale se hoofhek, langs die chalets. Jy ry ongeveer 100 m deur vlak water en oor spoelklippe so groot soos waatlemoene.

Van die rivier af loop die tweespoorpad 2 km teen die antieke Attequaskloofpas uit tot by ’n murasie van ’n ou tolhuis. Dié bergpas was deel van die geskiedkundige Ossewaroete wat by Heidelberg in die Kaap begin en koloniale trekboere en transportryers tot by Oudtshoorn gebring het. Van 1689 tot 1869 – dus 180 jaar – kan jy dus sê dit was die eerste N1-snelweg van die Kaapkolonie.

Bonniedale se deel van die Ossewaroete loop dood teen die Outeniqua-natuurreservaat waar Kaapse Natuurbewaring ’n hek opgerig het met ’n kennisgewing dat slegs permithouers toegang het.

Die Attequaskloofpas kronkel deur die reservaat, verby ’n Britse fort, en eindig op die plaas Saffraanrivier waar die oorspronklike Ossewaroete by die R328-streekpad aansluit.

By Kaapse Natuurbewaring se hek draai jy egter regs en ry bergaf na Bonniedale se Footloose-piekniekplek langs die Kammarivier. Hier kan jy uitspan, maar ons stel voor jy ry nog ’n ent verder na ’n veel lekkerder aftrekplek.

Die roete neem jou bergop tot by die Sunbird-kamp. Nico waarsku die roete is besonder taai – hy vertel dat ’n konvooi motorjoernaliste met die bekendstelling van ’n sekere 4x4-sportnuts nie een teen die berg tot by Sunbird kon uitkom nie. Ons moet bieg ons het ook effens gesukkel om die pad baas te raak, maar – dalk danksy ons ryding se slim elektronika – kon ons dit wel tot bo maak.

Die uitsig van Sunbird af is skouspelagtig en jy kan jouself beslis op die skouer klop terwyl jy ’n braaivuur aansteek vir middagete. Hoor net eers by Nico of daar enige brandgevaar is.

Ry nou teen die skuinste af en draai regs op die Grootkloof- en Honeybush-roete. Nico vertel die Honeybush-roete laat hóm selfs ril en hy raai gaste soms aan om eerder met die Attequaskloofpas terug te ry.

Die Honeybush-roete neem jou deur Bonniedale se mooiste deel, maar naby die einde van die roete moet jy in ’n smal tweespoor teen ’n berghang afry tot in die loop van die Kammarivier. Dié skuinste verg dat jy die draaie presies reg aanpak, anders kan jy die eng spoor byster raak en teen die hange afrol...

Toemaar, Nico sal mooi verduidelik hoe jy moet maak as jy kans sien vir die Honeybush-roete.

Ter wille van deeglikheid het ons wel die pad getakel, en die Landie waarin ons gery het, het skaafmerke op sy buffer en wielvellings gekry. Wees dus gewaarsku: jou voertuig kan dalk beskadig word op dié roete.

Nou ry jy een laaste keer deur die Kammarivier en dan is jy terug by die begin- en eindpunt. Knap gedaan!

Die Bonniedale-vakansieplaas het ’n swembad, kampplek, selfsorghuisies en ou woonwaens waarin jy kan oornag. Dis ’n lekker plaas vir spanbounaweke of familiesaamtrekke, én hier is selfs ’n saaltjie vir troues.

Groot trek
Tentvygies langs die pad versier die geskiedkundige roete. Die Ossewaroete is in 1689 uitgelê in opdrag van Simon van der Stel, VOC-goewerneur van die destydse Kaapkolonie.

Wat jy moet weet

Maksimum getal voertuie

Onbeperk.

Kry ek ’n kaart?

Ja.

Sal my voertuig krap?

Die kans is goed, ja.

Moet ek ’n kompressor neem?

Ja.

Kan ek braai langs die pad?

Daar is piekniekplekke op die roete, maar hoor eers by die eienaars of jy mag vuur aansteek.

Kan ek halfpad omdraai?

Daar is ontsnaproetes as dinge té rof raak.

Is daar selfoonsein?

Nee.

Beste tyd om te gaan?

Heeljaar.

Kan ek my gesin saamneem?

Ja, beslis.

Net vir die dag of die naweek?

’n Naweek, en bring julle fietse.

Hoe lank neem dit?

Minimum drie uur.

Is daar ablusiegeriewe?

Nie op die roete self nie.

Aanwysings

Van Mosselbaai af vat jy die R327 deur Herbertsdale en ry 60 km tot by die padpredikant vir die plaas Vredelus regs. Volg die plaaspad vir 19 km tot op Bonniedale.

Kantoorure

08:00 tot 18:00

Aankoms- en vertrektyd

14:00 en 10:00 (verblyf).

Prys

R250 per voertuig.

Kontak

044 631 0900, info@bonniedale.com, bonniedale.com

GPS

S33.87350 E21.86027