Kyk: Hier’s vanjaar se top-onderwaterfoto’s!

Meer as 5 000 mense van 65 lande het vir vanjaar se Onderwaterfotograaf van die Jaar-kompetisie ingeskryf.

Dié jaarlikse kompetisie vier kiekies wat onder die oppervlak van die see, mere en selfs swembaddens geneem is. Die 2019-wenners is onlangs bekendgemaak!

Britse fotograaf Richard Barnden is as algehele wenner gekroon vir sy foto wat die oomblik vasvang hoe ’n groep rifhaaie ’n bastergaljoen verorber.

©Richard Barnden/UPY 2019. ‘The Gauntlet’. Wenner: Onderwaterfotograaf van die Jaar; Wenner: Gedrag

Dr. Alexander Mustard, die hoofbeoordelaar, sê: “Fotografie gaan daaroor om oomblikke vas te vang. En wat ’n onvergeetlike oomblik is dié nie! Die fotograaf gebruik ’n wyehoeklens om ’n mens tot ín die drama van die jagtog te vat, met die haaie wat soos ’n golf op hulle prooi toesak en waarlik die oseaan se wilde kant wys."

Die Spaanse fotograaf Eduardo Acevedo wen die kategorie vir mariene bewaring vir sy ontnugterende kiekie van ’n karetskilpad wat in ’n visnet vasgevang is:

©Eduardo Acevedo/UPY 2019. Wenner: Mariene bewaring

“Dié seeskilpaaie deurkruis die Atlantiese Oseaan om by die Kanariese Eilande uit te kom, en moet plastiek, toue en visnette probeer vermy. Die skilpad was gelukkig, ons kon hom bevry en die net verwyder," sê Acevedo.