Amanda van Wyk, Durbanville: Ek het dié petalje in die Addo-olifant- nasionale park afgeneem. Vier rooijakkalse het allerlei taktieke probeer om dié vlakvarkwyfie te uitoorlê om haar kleintjie te vang.
Sy was egter selfversekerd en het elke aanslag afgeweer. Maar toe is dit asof sy besluit: Genoeg is genoeg! Sy skraap toe die een jakkals wat stert tussen die bene wegdraf. Die ander drie het hom soos een man agterna gesit en saam met hulle maat (met sy gekrenkte eer) in die skaduwee gaan lê.
Ma en kind het doodluiters aanhou gras vreet, asof niks gebeur het nie.
