Die Raasblaar is die maatskappy se eerste klein boswa – hy laat ’n mens dink aan ’n teardrop-woonwa omdat dit eintlik maar ’n dubbelbed-op-wiele is, maar dit is waar die ooreenkoms eindig. Al is die wa klein, het hy byvoorbeeld ’n uitglybuitekombuis en ’n spenskas sonder sy gelyke.
Andries Bruwer, die man agter die Raasblaar, sê hy en sy gesin het oor die laaste tien jaar deur ’n hele paar Afrikalande getoer, dus weet hy presies wat nodig is om ’n boswa vir Afrika te bou.
Hy het die Raasblaar met drie beginsels ontwerp: Hy moes bekostigbaar wees; hy moes in ’n japtrap op- en afslaan; en hy moes lig genoeg wees sodat een mens hom maklik kan hanteer in die kampplek.
