Suid-Afrikaners sal nie sommer van fietswedrenne praat en nié die Cape Town-fietstoer noem nie. Dié individuele resies word gereken as een van die taaiste  eendagfietswedrenne ter wêreld.

Hierdie kuitkouer het begin as deel van ’n plan om ’n uitdagende fietsresies aan te bied wat die aandag sou vestig op Kapenaars se behoefte aan veilige fietsbane.  

Foto: Sam Reinders

Die Kaapse dagblad Cape Argus het ingestem om dit te borg, en op 28 Oktober 1978 het 525 ryers buite die Kasteel in Strandstraat aangetree vir die eerste Argus-fietstoer.

Van dié groep het 446 ryers 104 km later oor die eindstreep in Kampsbaai gerol (deesdae is die fietstoer só groot dat dele van die stad se strate op die dag van die resies gesluit word). Die resies was só ’n sukses dat die tweede een slegs ses maande later gehou is om saam te val met die Kaapstad-fees.

Oor die jare heen het die roete aansienlik verander, en die huidige een van 110 km neem ryers van die Kaapse middestad af in die rigting van Muizenberg, deur Simonstad, verby Smitswinkelbaai en dan oor Chapmanspiek aan die westekant van die Skiereiland, hyg-hyg uit teen die tawwe Suikerbossie-bult tot by die eindstreep in Groenpunt.

Die Chapmanspiekpad was van 2000-2003 weens die gevaar van vallende rotse gesluit, en die deelnemers het in dié tyd met ’n alternatiewe roete langs teruggery stad toe.

Deelnemers veg ook teen meer as net vallende rotse en op- en afdraandes. Sterk wind steek gereeld ’n stok in ryers se speke, en in 2002 was dit só warm dat die toer gestaak is.

Ongeveer 35 000 ryers het na verwagting vanjaar by die wegspring aantree.   

Bron: Cape Town Cycle Tour Trust
ONS SOEK JOU KIEKIES.
Het jy ou swart-wit foto’s wat die stories van toeka se toere, gesinsvakansies of avonture vertel? Stuur dit gerus na suzaan.hall@media24.com