In die 1800’s toe die spoorlyn tussen Gauteng en Durban gebou is, het heelwat van die Natalse Regeringspoorweë se personeellede in sulke huise gewoon; hulle het toegesien dat die treinspoor onderhou word. Dié huis behoort deesdae aan Joni en Wayne Warburton, en hulle het die plek mooi opgeknap.

Joni verduidelik sonder die breër familie was hier nie ’n padstal nie – die biltong, soetgoed en piekels kom immers uit die kombuise en droogkaste van broers, susters en skoonfamilie!

Die strooidakhuis skep ’n mooi prentjie teen die omliggende akkerbome. Wanneer ’n mens oor die drumpel tree, verras die moderne binnekant jou – ewe met ’n spoggerige koffiestasie!

Die kinders kan buite op die gras en klimraam speel terwyl die barista vir jou ’n flat white (R28) of ’n sterk Americano (R21) voorberei. Die Railhouse gebruik enkeloorsprongbone van die plaaslike Manna-koffiebrandery op Hilton. Vir ’n koekerigheid kan jy iets op die gebaktafel uitsoek – ek kan die piesangbroodjie (R15) sterk aanbeveel!

Indien ’n groter honger knaag, sit aan vir een van die ontbyte, van ’n heerlike bord braaikos (R50), tot ’n gesonder opsie soos granola, jogurt en bessiestroop (ook R50) of selfs ’n smoothie (R35). Of as die son reeds hoog sit, bestel middagete – hoe klink ’n halloumi-en-avo-roosterbroodjie (R55) of ’n hoender-en-mayonnaisewrap (R45)?

Hier’s ook allerlei ander dinge te koop – van blomsaad en plante tot kinderboeke en geweefde mandjies. En as jy in ’n selfsorghuisies in die omgewing bly, skaf sommer jou kruideniersware hier aan: seisoengroente soos bondels aspersies (R28) en braaipakke met alles van ’n hoendersosatie of ’n kruisskyf tot Vrystaatse skaaptjoppies (R90) is te koop en suiwelprodukte soos botter (R48 vir 500 g), jogurt (R31 vir 1 kg) en bokmelk (R30 per liter) kom van die Indezi River Creamery verder af in die pad. Jy kan ook klaargemaakte geregte aanskaf – die macaroni-en-kaas kos R100 (genoeg vir 4 mense) en Thaise groenkerrie (vir 6) R220.

Glo my, jy dink jy draf net gou in vir vinnige koffietjie... Maak maar gereed – jy gaan die hele middag hier wil bly, na die heuwels staar en luister hoe treine verbyrammel.

Waar? By die aansluiting van die D2346 en R103, reg oorkant die Granny Mouse Country House.

Oop: Elke dag van 7 vm.-5 nm.

Kontak: 082 829 6417 (Joni); therailhouse.co.za