Ek is een van daardie mense wat nie koffie drink wanneer ek opstaan nie. Nee, ek staan op óm koffie te drink.
Ek is ietwat van ’n gewoontemens en het my hele oggendroetine tot die punt verfyn waar dit presies is hoe ek daarvan hou.
Ek staan elke oggend 25 minute vroeër op as wat regtig nodig is, en voor ek enigiets anders doen, stap ek knyp-knyp kombuis toe en sit eers die koffiemasjien aan voor ek badkamer toe gaan vir al die dinge wat ’n mens doen kort nadat jy opgestaan het.
