Van die InKaroo-gastehuisie se voorstoep af sien ek hoe wolke teen die flank van die Langeberg afseil. Vir die dorp se onthalwe wens ek dit wil reën bring, die leiwaterdam lê halfleeg. Maar dis net wind.

Die kontras tussen hiér, in die Klein-Karoo, en skaars 20 km suid hiervandaan, in die Overberg, is skreiend as jy van die N2 af deur die Tradouwpas Barrydale toe ry: Aan daardie kant is die wêreld welig en boer mense met melkbeeste; hier maak wingerdstok en vrugteboom tussen nabankklippe op genade staat. ’n Seuntjie ry stadig op sy fiets verby en loer oor sy skouer of ek notisie neem.

Ek waai, en hy jaag skaam weg. Dis ’n lekker sit hierdie. Om die dorp te betrag terwyl die Barrydalers op ’n Maandagoggend hulle week begin. Waar die Huisrivier lê, loop ’n baan groenigheid en lappies druiwe deur die dorp. Daarmee saam weef die donker leiklipmure, geel doringboomdonsies en die blou berge kleure getrou aan die Karoo.

Maar laat ek ophou dagdroom! Ek drentel dorp-in, oor die R62 wat Barrydale met Montagu in die weste en Ladismith in die ooste verbind. Dié stukkie pad is gewoonlik al wat ’n mens van Barrydale sien wanneer jy deurry, maar dit bied die laaste paar jaar al meer: Nuwe restaurante maak oop, gastehuise maak oop, winkeltjies doen sake.

Bob Wolf
Bob Wolf
Bob Wolf, kolestoofkenner

“Nadat ek en my vrou, Loutjie, ons besigheid in Bronkhorstspruit aan die kinders oorgedra het, het ons die pad met ’n woonwa gevat.

Ons wou aanvanklik Weskus toe, maar gewaar toe ’n ou nagmaalshuisie op Barrydale. Ons het langs die gebou in die woonwa gewoon terwyl ons die plek gerestoureer het.

“Dis stil hier en relatief veilig. Jy ken amper almal en as daar hulp verleen moet word, kan ek my deeltjie doen.”

* Kontak Bob Wolf as jy ’n kolestofie vir die winter wil aanskaf:

082 328 3135; ndebelestoves.co.za

Dus: ’n goeie vertrekpunt indien jy Barrydale wil verken. Maar dis nie al nie – hier woon ’n mengelmoes van mense en bykans almal woeker, skep iets, maak Barrydale al hoe beter. Neem nou maar die huis op die hoek van die R62 en Spriggstraat. Hoekom hang die heining vol emaljeskottels? Ek gaan klop aan. Dis Loutjie en Bob Wolf se huis en nee, dis glad nie ’n slegte tyd nie! Kom, ons gaan sit op die agterstoep, nooi oom Bob.

Hy praat met ’n aksent. “Ons is oorspronklik van Twente,” verduidelik hy. “Dis ’n provinsie in Oos-Nederland wat aan Duitsland grens en ’n hele ent na weerskante toe praat die mense Twents.”

Teen die stoepmuur hang teëltjies met Twentse slagspreuke. Hy vertaal ’n paar: “Kom vrouw, wie goat noa berre waant de leu wilt noa hoes hen” (My vrou, kom ons gaan kruip in, die kuiergaste wil huis toe); “Leefde is blind, mèr a j’trouwd bint, goat oe d’ogen wel lös” (Die liefde is blind, maar sodra ’n mens trou, gaan jou oë tog oop). Neffens die slagspreuke staan ’n kolestofie. “Dis ’n Dover Pride 6,” sê oom Bob. “Hy verskil ’n bietjie van die Dover Welcome.”

Ons stap na ’n afdak waaronder nog talle kolestowe staan. Hy vertel van sy jare op Bronkhorstspruit en die smeltery wat hy en sy seuns begin het om onderdele te giet sodat hulle ou stowe kon herstel. Sedert 1992 bou hulle ook hulle eie reeks, Ndebele Stoves. Elke stofie het ’n eie gebruik, voorkoms, kenmerke… Sy hande streel liefderik oor die swart yster. “Dis ’n samebindende faktor, só ’n stofie.

Almal sit om hom, almal gooi houtjies in…” Ek wens byna daar wil skielik sneeu op die Langeberg lê sodat oom Bob vir ons ’n stofie kan aansteek. Só stook ons die gesels terwyl ek eintlik net oor die blikbordheining wou kom hoor. “O! die enamel!” sê hy laggend. “Die mense wat hier verbykom, dink sweerlik dis ’n seniele ou man wat sy rommel ophang! Maar die bedelaars… ai, die mense kom bedel gereeld.

Toe sê ek: Ek betaal hulle eerder vir elke skottel of bord wat hulle vir my bring.” En só het sy weldaad ’n kunswerk geword. Bob Wolf is nie die enigste Barrydaler wat met rommel mooimaak nie. Die ouens van die Magpie Art Collective dieper die dorp in se vindingrykheid ken g’n grense nie. Hulle kandelare, bestaande uit bykans enigiets waaraan jy kan dink, van stukkies glas, kraletjies en koperdraad tot hondekosblikkies en botteldoppies, hang die galery vol.

Shane Petzer van Magpie Art Collective met ’n vred
Shane Petzer van Magpie Art Collective met ’n vredesduifie

Dit is ’n plesierige mengelmoes, maar die ruggraat van ontwerp, herwinning en deesdae ook herdenking is steeds duidelik sigbaar. Een van die eienaars, Shane Petzer, vertel begeesterd van dié erfeniskandelare wat hulle maak: “Mense bring hulle familie-erfstukke soos teestelle, ’n ouma se bril, ’n pyp, iemand se oorlogswapens en juweliersware, en dit word dan alles deel van die kandelaar.

Iemand sal bel en sê “my suster is oorlede, ek bring haar goedjies” of “ek het al hierdie fieterjasies in my huis, kan julle dit bymekaarbring”. “Só kry ou goed weer nuwe waarde. Mense se herinneringe en kultuur word weer sigbaar, kosbaar, en dit vertel nuwe stories.”

Nog ’n inisiatief is die vredesduifies gemaak uit ou melkbottels (R300 stuk) wat hier van Barrydale af hulle pad na allerlei uithoeke vind.

“Ons versoek die kopers om hulle vredesduifies in ’n spesiale plek op te hang,” sê Shane. “En almal merk dan die foto’s van hulle duifies op sosiale media met #magpiepeacedove.”

Loer op Instagram – daar hang duifies van ’n stoep in Observatory, Kaapstad, tot in die Bethulie-konsentrasiekamp se begraafplaas, in Parys, Rostock, Zürich…

Magpie Collective

Waar? Van Riebeeckstraat 27

Oop Ma.: 2 nm. -5 nm.; Di. tot Vr.: 10 vm. -5 nm.; Sa. gesluit, So.: 9.30 vm.- 1 nm.

Kontak 079 318 4289 (Shane); @magpieartcollective op Instagram

Die son sit nou hoog en vanoggend se wolke het verdwyn. Ek wil gou iets te ete gryp voordat ek by die wewery inloer en mik terug R62 toe. Voor in die pad wag die seuntjie met die fiets. Dan skraap hy sy moed bymekaar en trap vinnig tot by my. “Vat Tannie foutes? Wil Tannie nie van my ’n foute vat nie?” ’n Maatjie dop ook nou iewers uit en die twee soek ’n antwoord.

“Wat’s julle name?” vra ek. 

“RJ,” antwoord die outjie. Hy stamp sy maat teen die skouer. “En hy’s Tasswell.”

Goed, laat Tannie daai foute vat. Hulle gaan sit op die slaghuis se stoep, die fiets pronkerig staangemaak. Hulle glimlag breed, duime in die lug. “Nou hoe kry ek die foto by julle?” wil ek weet.

“Tannie kan dit vir Anita van die slag- huis stuur.” Ek stap in om Anita se nommer en sommer ’n sakkie biltong ook te kry. Dis lekker hier op Barrydale!

R.J. du Toit en Tasswell  Marthinus
R.J. du Toit en Tasswell Marthinus

By die Barrydale Hand Weavers is dinge net so gesellig. Die weefstoele klater elkeen teen sy eie ritme. Die wewers pluk die spoele heen en weer, hulle voete speel die pedale soos orrels en die duisende katoendrade slalom sonder einde verby mekaar. Die toesighouer, Jackie Fortuin, werk al agt jaar hier.

Sy wys my rond en verduidelik bo die lawaai hoe dinge werk: Die katoendraad word eers op ’n groot raam gerol, waarop elke individuele draad sy lê kry en die wewers kan sien of daar dalk iewers ’n swak plekkie is. Van dié “tol” af word die drade dan as die skering (die drade wat in die lengte van ’n weefstuk gaan loop) op ’n weefstoel se raam oorgedra.

Tot dusver het Temmy Nqxulelo manalleen die katoen op die groot tol gedraai, maar om die drade wat nou soos vars spaghetti hang elkeen oor die regte houthakie op die weefstoel te span verg meer hande.

Die wewers weet net hóé en dis nie lank nie toe klop-klop nóg ’n weefstoel ’n deuntjie. Voor my oë neem handdoeke, dekens en tafeldoeke vorm aan. Die raamwerke swaai sekuur, die skerings skuif aks vir aks aan en die spoele met die gekleurde dwarsdraad vlieg heen en weer deur die wolkwit katoen – donkergrys strepies soos leiklip ná die reën, geel bane soos die doringbome se bloeisels en ’n blou dynserigheid net soos die Langeberg.

SUE-RELLEN DE KOCK EN TEMMY NQXULELO  VAN BARRYDAL
SUE-RELLEN DE KOCK EN TEMMY NQXULELO VAN BARRYDALE HAND WEAVERS
Barrydale Hand Weavers

Waar?

De Kockstraat 37 (skuif eers-daags na die ou Barrydale-kelder aan die westekant van die dorp)

Oop

Ma. tot Do.: 8 vm.-5 nm.; Vr.: 8 vm.-1 nm.

Kontak

028 572 1488; barrydaleweavers.co.za

Waar kan ek weefwerk aanskaf?

Die wewery se webwerf het ’n aanlynwinkel. MUD aan die oostelike punt van die R62 verkoop ook dié produkte. Jy kan ook koffie, ontbyt en ligte middagetes hier geniet en tuis-gebakte suurdeegbrood teen R30 stuk koop. Die winkel is elke dag oop van 8 vm. tot 3 nm. 028 572 1125; mud.co.za Van die produkte is beskikbaar op yuppiechef.com

EET HIER

Mez Karoo Kitchen

Mez se tuin is mals, die stoele en tafels guitige rooi en groen, die kunswerke keurig, die drie inwonende katte vol geite... jy kon netsowel iewers op die Spaanse platteland wees.

Michelle Berry, sjef
“Ons het jare gelede in Port Elizabeth gewoon en op ’n dag die platteland ingery op soek na ’n plekkie om eendag af te tree. Toe ons Barrydale sien, is dié planne sommer vervroeg!”
Mez Karoo Kitchen
Mez Karoo Kitchen

Die restaurantjie wat Michelle Berry saam met haar seun Kyle (bo) bedryf, is intiem. Lanterns wieg in die aandbriesie, die musiek is meesleurend en in die kombuis klink ’n gesellige gerinkel op waar die twee saam met Merencia Britz doenig is. Dis ’n driemanvertoning; dus is die spyskaart beperk. Jy sou dink dit maak ’n mens se keuse makliker, maar álles lyk lekker!

“Die Klein-Karoo is baie Mediterreens in sy klimaat al het ons nie ’n see nie,” vertel Michelle. “Hier’s lamsvleis en dinge soos olywe, tamaties en eiervrug aard goed, en dít is waarmee ons kook.”

Ek bestel Melanzane alla Parmigiana (R145) met slaai, maar hou ook die Griekse keftedes met tzatziki en die visgebak vir ’n volgende keer in gedagte. Voorgereg is Turkse murgpampoentjiekoekies (R45) en ’n glas tuisgemaakte gemmerbier. Michelle-hulle kook ook Mexikaanse disse en selfs ’n paar Kaaps-Maleise geregte soos lamskenkelkerrie en bobotie.

Waar? Van Riebeeckstraat 24

Oop Do. tot Sa.: 12 nm.-9 nm.; Wo. en So.: 6 nm.- 9 nm.: Gesluit op Ma. en Di.

Bespreek vooraf.

Kontak 082 077 5980 (Michelle)


The Maker’s Brew

Die “maker” van alles wat jy hier proe, is die kosfotograaf en bierkenner Ryno Reyneke. Dié medeskrywer van die 2012-boek African Brew was glo nooit “ ’n groot bierdrinker” nie, maar die proses van biermaak het hom geboei. Deesdae het Ryno vier biere in sy reeks: ’n blonde (lager), amber, porter en saison (R35-R50). Biermaak is vir hom opwindend.

“Die wetenskaplike proses is belangrik, maar dit is nie álles nie. Ek wil hê my biere moet – soos wyn – van brousel tot brousel subtiel verskil. Dís waarin die vreugde vir my lê – dis ’n voortdurende reis, elke keer ’n nuwe ontdekking.”

En bier en pizza is die perfekte pasmaats – albei se smaak hang af van hoe suksesvol die gistingsproses was. Ja, Ryno gebruik suurdeeg vir sy eg Italiaanse pizzas (R85-R105) en hy rol nie die deeg uit nie, dit word met die hand gerek.

“Die tamatiesous maak ek self en ek glo dat ’n mens – buiten die sous en mozzarella – nie meer as drie bestanddele op ’n pizza sit nie.”

Jy’ t ’n keuse tussen salami, porcini-sampioene (wat Ryno in die berg pluk) en olywe, of gevlokte varkvleis (die skouer kook vir nege uur!), balsamiese reduksie en kersietamaties, of Ryno se gunsteling: ansjovis, kappertjiesaad en olywe. Daar’s ook ’n veganpizza op die spyskaart en as jy nie ’n groot bierdier is nie, probeer die tuisgemaakte limonade.

The Maker’s Brew
The Maker’s Brew
The Maker’s Brew
The Maker’s Brew

Waar? Aan die R62

Oop Wo. tot So.: 10 vm.-7 nm.

Kontak 083 626 6121 (Ryno)


Diesel & Crème

Die sirkus is op die dorp! Altans, só voel dit wanneer jy by Diesel & Crème langs ’n tafel inskuif. Jou oë weet nie mooi waar om te vat of te los nie: Uit die dak hang ’n ou fiets en ’n karnaval-ponie getooi in stringe liggies, buite op die stoep staan kafeespeletjies, ’n ou bromponie en ’n groot geel haas.

Ou advertensieborde versier elke oop stukkie muur. Die speelse dekor het dié gewilde eetplek op die map geplaas, maar die eintlike impakspelers is hulle hamburgers en melkskommels.

En op ’n warm dag kan ’n mens lekker onder die afdak met waterverkoeling aansit. G’n wonder hier staan altyd ’n rits motors nie. Ek bestel ’n aarbeimelkskommel (R45) en dié is reeds só groot dat ek nie weet hoe ek ’n burger ook nog kan baasraak nie!

Diesel & Crème
Diesel & Crème

Ander melkskommels kom verby – nóg groter as myne! Ek betrag die spyskaart om te probeer raai wat die mense by die tafel langsaan bestel het. Ah, dis seker ’n grondboontjie-en-piesangmelkskommel daai.

En die ander een het sjokoladebrownies in! Die Diesel-biefburger (R95) arriveer met ’n vulkaan van gesmelte cheddar en mosterd-mayonnaise wat oor die pattie borrel. Die aartappelskyfies is dík gesny en die lewe voel lekker.

Waar? Langs die R62, aan die westelike punt van die dorp.

Oop Elke dag buiten Wo. van 8 vm.-5 nm. (Gesluit van 24 Mei tot 17 Junie 2021.)

Kontak 028 572 1008; dieselandcreme.co.za


Wat sê die mense?

Jackie Fortuin (regs), wewer

Jackie Fortuin, wewer
Jackie Fortuin, wewer

“Saamstaan is Barrydale se ding. Hier ken almal mekaar se kinders. Ek sal dié dorp nooit verlaat nie!”

Arran Bastable, eienaar van Barrydale Hand Weavers

Arran Bastable, eienaar van Barrydale Hand Weavers
Arran Bastable, eienaar van Barrydale Hand Weavers

“My vrou, Kate, se ouers woon hier; dus het ons oor die jare baie kom kuier. “In 2018 het ek my werk as elektriese ingenieur vaarwel geroep en die wewery gekoop. Barrydale het ’n kunssinnige gemeenskap en die inwoners is ’n mengelmoes van regoor Suid-Afrika én die wêreld. Op Woensdae speel almal – van 12 tot 80 jaar oud – saam rolbal.”

Dagboek

Barrydale in Bloom is ’n naweek lange tuinfees waartydens besoekers met ’n kaart in die hand deur Barrydalers se tuine kan toer. Hier is plaastuine, dorpstuine en selfs groentetuine te sien.

Wanneer? Die 2de naweek van Oktober

Tydens die Barrydale Art Meander is kunstenaars se ateljees oop vir besoek en die manne van Magpie bou in samewerking met ’n paar welsynsorganisasies ’n Kersfees-installasie waarna die liggies aangeskakel word.

Kore en orkeste tree op en die inwoners neem deel aan ’n optog en toneelstuk waarvoor enorme marionette gebou word.

facebook.com/BarrydaleArtMeander

Wanneer? 16 Desember

WAT NOG?

Besoek House of Books

Dié huis by Van Riebeeckstraat 37 is van die vloer tot plafon vól boeke! Jy kan maklik ure lank hier ronddwaal. Die boeke is volgens kategorieë ingedeel, billik geprys en sal maak dat jou beursie jou brand.

House of Books
House of Books

Koop keramiek

Die kunstenaar Helen Vaughan se werk is te koop in The Maker’s Brew se gebou langs die R62. Haar bekers, bakke, kersblakers en vase het unieke aardse skakerings en teksture. By Red Seal Design Studio in die nywerheidsgebied (volg die R324 na die Tradouwpas en draai links in Nywerheidslaan) kan jy plantpotte teen ’n appel en ’n ei aanskaf.

Die werkswinkel is op weeksdae oop van 7.30 vm. tot 5 nm. en oor naweke van 8 vm. tot 2 nm.

Swem in die Tradouw

Die Tradouwpas (sowat 15 km lank) is een van Thomas Bain se meesterwerke en is in 1873 voltooi. Dit het vir binnelandse boere ’n pad deur die Langeberg oopgemaak na Port Beaufort (Witsand) in die Breëriviermonding.

Dis ’n mooi pad met verskeie stilhouplekke vir ’n piekniek. Jy kan in die rivierpoele swem. Presies 7,5 km van waar jy van die R62 afdraai op die R324, is ’n stilhouplek op regterhand (daar is ’n inligtingsbord oor endemiese visspesies).

Los jou motor hier en stap dan op die muurtjie langs met die pad aan tot oorkant ’n groot akkerboom, waar jy talle afklimplekke tot by die stroom aantref.

Bestel jou naweekspens

The Farm Deli (langs MUD) se produkte is organies en meestal plaaslik. Hier’s brode, eiers, olyfolie, droëvrugte, sousies en speserye, organiese skoonmaakmiddels, melk, joghurt, kaas, botter en room...

Selfs suiwelprodukte van skaapmelk! Bykans alles op die rakke kom van Kenny en Erna Scheepers se permakultuurboedery, Metanoia, wes van die dorp, met lamsvleis uit die dieper Karoo en beesvleis (die beeste vreet slegs gras en klawer) uit George se wêreld.

Die deli pak vir besoekers ’n Welcome Basket met al die produkte wat jy vir jou paar dae se selfsorgverblyf nodig het en kom lewer dit by jou gastehuisie af. Bestel vooraf by 060 361 3229. 

The Farm Deli
The Farm Deli

Joubert-Tradauw Alfresco Deli

Kosfoendi’s sal Beate Joubert van Kokkedoor-faam onthou, of dalk staan haar resepteboek, Proe die Klein-Karoo, op jou boekrak.

Wanneer jy hier kuier, is dit inderdaad wat jy doen, want die bestanddele wat Beate vir haar Karoo-tapas gebruik, is seisoenaal, vars en meestal net hier op hulle plaas verbou.

Die peuselborde (R250, genoeg vir 2 mense) bestaan uit kombinasies van vrugte (kakamasperskes, pere, vye…) varsgebakte suurdeegbrood met kouevleise, kase, tuisgemaakte piekels en patees en heerlike spanakopita of pasteie. Beate maak ook burgers, gourmettoebroodjies, slaaie en oor naweke pizzas. In die winter kan jy uitsien na kerrie, brijani, beesstert of bobotie.

’n Boer is mos altyd besig, maar indien jy gelukkig genoeg is om Beate se man, Meyer, raak te kuier sal hy jou baie kontreistaaltjies vertel: Hoe hy en Giniel de Villiers as seuntjies kaskarre gebou het, hoe sy tyd as uitruilstudent in die Napavallei, Kalifornië, hom oortuig het dat hy en sy pa self moet begin wyn maak eerder as om hulle druiwe aan ander kelders te verskaf en dat jy hier op die plaas selde “meer as ’n hektaar van dieselfde grond sal aantref”.

“Die Klein-Karoo het eintlik maar swak grond,” brei hy uit. “Ek hou baie van pinot noir en het drie goeie oesjare gehad, maar toe brand die wingerd uit. En daarna plant ons toe shiraz – dis ’n meer geharde kultivar vir dié aarde.”

Die wyn wat hulle van dié druiwe verkry, is nie so swaar nie en het ’n meer klassieke Rhône-styl, reken Meyer. Proe ook gerus die 2016 chardonnay (12 maande op die moer in vate verouder) en die bekende R62- Bordeaux-versnit (cabernet sauvignon, merlot en cabernet franc).

Indien jy by die Alfresco Deli aansit, is ’n wynproe aangebied deur Erika Winter (bo) gratis. Indien nie, kos dit R30 p.p.

Joubert-Tradauw Alfresco Deli
Joubert-Tradauw Alfresco Deli

Waar? 12 km wes van Barrydale aan die R62

Oop Ma. tot Sa.: van 9 vm. -5 nm.; So. slegs vir groepbesprekings – reël vooraf.

Kontak 082 304 9000 (Beate, slegs via WhatsApp); joubert-tradauw.com 

NOG OPSIES

By Ruth62 (langs die R62) bak Lydia du Toit (bo) van Dinsdag tot Sondag roosterkoeke. Een met appelkooskonfyt en kaas kos R45 en die lywiger opsie met spek en kaas R60.

The Country Pumpkin (ook langs die R62) het buite tafels onder sambrele, gewoonlik ’n breakfast special teen R60 en hier’s ook bobotie, lasagne en vis-en-tjips (R95-R110) op die spyskaart.

ruth62
ruth62

BLY HIER

InKaroo Cottage
InKaroo Cottage

InKaroo Cottage

Dié mooi selfsorghuisie is waar-skynlik in die stilste uithoek van die reeds rustige Barrydale. Dit het ’n oop leefvertrek (met ’n kolestofie), ’n kombuis met die nodige, ’n dubbelkamer en ’n badkamer met ’n gróót hoekbad en ’n stort.

’n Trappie lei na nog twee enkelbeddens in die solder. Jy kan soggens op die stoep sit en na die Langeberg staar en saans in die ommuurde agterplasie onder die doringboom aansit. (Ja, hier’s ’n braaiplekkie.)

Koste

Vanaf R1 200 p.n. vir 4.

Waar? Bainstraat 2

Kontak 076 614 4318 (Danny Brownlow); lekkeslaap.co.za

Appelhuis
Appelhuis

Plaas Wegbreek

Die Appelhuis (voorheen ’n stoor) is al bykans ’n eeu oud en het mooi klipmure, ’n strooidak, ’n voorstoep met ’n uitsig oor perske- en pruimboorde, en ’n beskutte agterstoep met ’n braaiplek.

Die huis het 1 dubbel- en 3 enkelbeddens, sowel as ’n buitekamer met nog ’n dubbelbed. Die Withuis (slaapplek vir 4) is in die volgende boord en is net so knus ingerig, hoewel ietwat kleiner.

Dit het ook twee kuierstoepe en in bloeiseltyd voel dit asof jy in die middel van ’n ruiker vakansie hou.

Koste

Vanaf R700 vir 1 tot R2 450 vir 7 gaste.

Waar?

7 km oos van Barrydale langs die R62. (Wees op die uitkyk vir die Doornrivier / Appelhuis-aanwyser)

Kontak 028 572 1763; plaaswegbreek.com

Karoo Moon Motel
Karoo Moon Motel

Karoo Moon Motel

Dié motel is op Diesel & Crème se perseel en spog met dieselfde vintagedekor as die restaurant. Die Suite en die Studio het elk ’n en suite-dubbelkamer, leefvertrek, kombuisie en ommuurde patio waar jy saans die Karoo-maan kan sit en dophou.

Koste R895 p.n. vir 2.

Waar? Aan die westelike punt van die dorp, langs die R62

Kontak dieselandcreme.co.za

Lentelus
Lentelus

Lentelus

Die Orchard Cottage het ’n grond-verdieping, met nog ’n eenheid bo. Albei het ’n leefvertrek met ’n kaggel, ’n yskassie en ’n koffiestasie.

Die onderste slaapkamer (en suite) het twee enkelbeddens en die boonste een (ook en suite) het ’n koningingrootte bed en ’n lieflike houtdek met ’n uitsig oor die boorde.

Hier’s ’n swembad op die werf en gaste kan die plaas te voet of op hulle fietse verken en vrugte pluk.

Koste R700 p.p. (ontbyt ingesluit)

Waar? 12 km wes van die dorp, langs die R62

Kontak 082 579 1246 (Helena Joubert); lentelus.co.za

Over Karoo Inn
Over Karoo Inn

Over Karoo Inn

’n Gawe plek om oor te slaap indien jy net vir ’n aand op die dorp is.

Over Karoo Inn het drie aangrensende eenhede – twee met ’n dubbelbed en een met ’n dubbel- en twee enkelbeddens. Elke eenheid het ’n badkamer, koffiestasie en ’n stoepie.

Dit is ’n slegs ’n olyfgooi van die naaste restaurante af.

Koste Vanaf R800 p.n. vir 2.

Waar? Tennantweg 16

Kontak 060 863 4313; lekkeslaap.co.za