Die eienaar, Charl Pretorius, sê die gedagte is om ’n veilige kampplek in die bos te bied sonder wilde diere. Tog is dit ’n boskamp in die ware sin van die woord, want tans is daar geen elektrisiteit of water nie. Charl-hulle beplan wel om water aan te lê sodat kampeerders lopende water by hulle staanplek het, plus dan ’n gasgeiser en spoeltoilet. Intussen moet kampeerders vir hulle eie water sorg en hier is ’n kompostoilet en ’n bosstort wat jy self moet vul.

Die terrein is meer as 10 jaar al olifantvry danksy die heining, wat beteken die bos is lieflik welig, sê Charl. Boonop is die kampplekke ingerig by die groot doppruimbome – al is dit ’n bladwisselende boom, is dit ’n uitstekende koelteboom wat amper heeljaar blare het.

Hier is altesame 20 staanplekke wat in vier groepe van 2-8 verdeel is. Hulle is ongeveer 200 m uitmekaar en buite sig van mekaar.

Bring die kinders se fietse, jou drafskoene en verkyker en kom geniet die natuur. Sodra die water aangelê is, beplan Charl-hulle om njalas en sebras in die omheinde kamp vry te laat.

Charl het destyds – vóór die koms van Dinokeng – die eerste besigheid in dié omgewing begin, en ná byna 30 jaar is hy steeds die eienaar van die Kwalata-wildlodge, ook in Dinokeng. Hy was ook deel van die groep van tien onderhandelaars wat die totstandkoming van Dinokeng bewerkstellig het.

Prys: Afhangend van die seisoen R150-R200 p.p.p.n. (halfprys vir kinders).

Kontak: 083 459 9075, njalabushcamp.co.za, info@njalabushcamp.co.za