Mense se smaak verskil as dit by hulle gunstelinglandskap kom. Sommige mense hou van die groen woude in die Tuinroete, terwyl ander weer rooi Kalaharisand verkies.

Ons het by ons Facebookvriende gaan luister van watter vyf soorte 4x4-roetes hulle die meeste hou.

Agterpaaie, bergpasse, smal bospaadjies en enige sandpad wat my siel verlos en laat vlieg! – WesMon Gerber

1. Vlaktes

Vlaktes
Vlaktes

Die wye vlaktes van die Groot-Karoo het ’n spesiale bekoring vir diegene wat daarmee grootgeword het. Ander raak neerslagtig as hulle so nietig voel in die ooptes.

Vlaktes gaan hand aan hand met spoed sodat jy met die lang afstande kan afreken – en daarom moet jy versigtig wees vir lekbande.

“Ek stem vir landskapwêreld.” – Ria MJ Pieterse

2. Berge

’n Grappie lui dat die Kaap mooier sou wees as die berge nie so in die pad was nie. Die grootste uitdaging van bergpasse is dat jy teen ’n afgrond kan afstort.

Hier is ook klippe wat bande knou en die onderstel kap, maar die uitsigte vergoed dubbel en dwars vir die moontlike gevare.

“Agterpaaie deur daardie onbekende bergroetes.” – Jan Maritz

3. Rivierlangs

In ’n rivier se droë loop gaan jy allerlei soorte oppervlakke teëkom: modder, klippe, sand en gras. Rivierlope het ook unieke uitdagings soos diep water wat oorgesteek moet word én klippe.

Soms word jy beloon met diep klowe waar varings en tamariskbome uit rotsskeure groei.

“Ek kies riviere, want die plantegroei is interessant.” – Suzaan Kritzinger-Klopper

4. Woestyne

Om ’n woestyn oor te steek sit nie sommer in enigeen se broek nie, en dis die grootste bevrediging wanneer jy daarin slaag.

Sand verg hoërgraad-bestuursvernuf, tegniek en herwinningstoerusting indien dinge sou skeefloop.

Sjoe, dis lekker as jy teen ’n duin uitjaag en daarin slaag om veilig oor die kruin te tiep!

“Uitdagende sand is boaan my lys.” – Nelia Grundling

5. Seelangs

Almal hou van die see. Ons wil dalk nie almal voltyds langs die oseaan en soutsproei woon nie, maar dis lekker om langs die waters te ry, hengel of sonbaai.

Nes woestyne verg die sand hier bogemiddelde bestuursvernuf en goeie oordeel. Onthou om die sout van jou ryding goed af te was met vars water!

“Sandpaadjies langs die kus.” – Cornell Mans