Die Bosveld is ’n byna mitiese plek. ’n Plek van stories... van Jock se avonture en grootwildjagters se noue ontkomings. En ryk aan daardie atmosfeer wat net ’n afgesonderde, wilde plek jou kan bied.

Dis ’n plek van ontvlugting, waar jy teen sononder ’n vuurtjie aanblaas en later terugsit en kyk hoe nagapies hop deur die takke van die appelblaar bo jou.

Lenong Drive in die Marakele- nasionale park

Teen sonop die volgende oggend maak die geskater van ’n bosveldfisant jou wakker en kort daarna hoor jy ’n kwêvoël uit die hoogtes van ’n maroelaboom.

Iewers gaan jy van aangesig tot aangesig kom met ’n kremetart, of dalk ’n meneer van ’n njalaboom. Jy gaan troppe rooibok sien, dalk ’n olifant en later uitgekyk raak aan die hoeveelste geelbekneushoringvoël wat verbyvlieg.

Bowenal kom ’n mens Bosveld toe om te droom oor ’n tyd toe die lewe skynbaar eenvoudiger was, van ’n tyd toe vanaand se kampplek die enigste ding was wat saakgemaak het. Hierdie reisroete vat jou na al hierdie diere, voëls en bome – én hartsplekke.

Die Bosveld se paaie – selfs die teerpaaie – is plek-plek erg vrot. Ry liefs die roete met ’n sportnutsvoertuig of bakkie – jy sal regkom met ’n 4x2 met goeie grondvryhoogte.

Wees versigtig op kleiner “teerpaaie” wat dekades laas ’n kontrakteur gesien het.

Daar is soms meer slaggate as wat daar teerpad is! Hou jou spoed laag, dan het jy genoeg tyd om die slaggate te pypkan. Beskou dit as deel van die avontuur!

Buffel, Marakele- nasionale park


DAG 1: MARAKELE

Die Marakele- nasionale park is skaars 2½ uur se ry uit Pretoria (sowat 220 km). Rek bene op Thabazimbi, haal jou verkyker uit en bespied die uitgrawings teen die hange van die Berg van Winde, waar ystererts dekades lank gemyn is (bedrywighede staan tans meestal stil).

Indien jy nog nie al jou inkopies gedoen het nie, draf in by die Thaba Mall (The Biltong Box is ’n lekker winkel...). Volg die teerpad uit die dorp na die ingang van die park en gaan slaan jou tent op in die Bontle-ruskamp.

Sodra jou tent staan, vertrek dadelik op jou wildrit sodat jy die middag ordentlik kan benut. Hoewel afstande kort is, kan dit lank vat om te ry. Veral die bergpaadjie is só smal dat een buffel ’n verkeersknoop kan veroorsaak.

Die veld rondom Bontle – in die “plat” deel van die park – is tipies bosveld, maar vat Lenong Drive wat jou voetjie vir voetjie teen die manjifieke Kransberg uitlei – dit is die westelike punt van die Groter-Waterberg.

Die plantegroei verander namate jy hoogte kry: In die klowe staan opregte geelhout en bo suikerbosse en bergsipres.

Bo gekom, kan jy op ’n bankie sit en een van ons land se mooiste uitsigte geniet. Onthou jou verkyker en hou die kransaasvoëls dop – hier’s ’n broeikolonie.

Kruie laatmiddag weer bergaf na jou lêplekkie by Bontle. Vanaand slaap jy rustig – jy’s in die Bosveld.

BLY HIER

Marakele- nasionale park Bontle-ruskamp: Kamp: R325 p.n. vir 2 mense, R100 per ekstra persoon, R50 per ekstra kind (maksimum 6 mense). Safaritente: R1 470 p.n. vir 2 mense. Tlopi-tentkamp se safaritente is luukser: R1 705 p.n. vir 2 mense.

Motswere-gastekothuis: R2 935 p.n. vir 4 mense, R530 per ekstra persoon (slaapplek vir 8). Kinders 2-11 jaar oud kry afslag.

KONTAK 012 428 9111; sanparks.org


Moriti Bush Camps se Nyala-kamp het sy eie kombuisie (in die agtergrond).

DAG 2: TOM BURKE

Vandag het jy twee opsies: Jy kan ’n hoofweg vat, of ’n agterpad wat jou diép in ’n hoek van die Limpopo-provinsie neersit waar min toeriste kom.

Vir laasgenoemde moet jy bakkie ry, want dis grondpaaie wat enigiets van erge sinkplaat tot sand en modder (in die reënseisoen) na jou kant kan gooi.

Korrel vir Sentrum (net vendusiekrale). Talm op die klassieke bosvelddorpie Steenbokpan – hier is brandstof en koue koeldrank.

Ry van hier af noord via Stockpoort tot by Tom Burke. Hierdie roete is sowat 270 km lank en jy het vier uur nodig om dit te ry.

Die makliker roete is omtrent heelpad teerpad. Moenie terugry na Thabazimbi wanneer jy Marakele verlaat nie. Volg die openbare grondpad wat noordwaarts deur die nasionale park loop (jy gaan nog wild kan sien, en die mooi kranse van die berge oos van die pad) tot jy by die R510 kom – draai daar regs in die rigting van Lephalale.

Lephalale is die laaste groot dorp op hierdie roete; koop hier wat nodig is as jy gisteraand jou tande met jou vinger moes borsel. Volg die pad noord uit die dorp; jy ry parallel met die Mokolorivier (ook bekend as die Mogol).

Wanneer jy by Tom Burke kom, gaan jy wonder waar die dorp is. Hier is nie een nie! Net anderkant die kruispad (waar die N11 die R572 kruis) is Tom Burke se vulstasie en koöperasie.

Maar jy kom na hierdie omgewing om die Limpoporivier te geniet en daar is geen beter plek hiervoor as Moriti Bush Camps nie.

BLY HIER

Moriti Bush Camps 

Hier is twee kampplekke (Nyala en Matopi). Die geriewe is puik, die uitsig onverbeterlik en die enorme bome op die oewer bied oorgenoeg skadu. Nyala (met krag): R280 p.p. en Matopi (geen krag): R230 p.p. Kinders jonger as 12 kamp verniet (maksimum 8 mense).

Jy kry afslag wanneer jy vir 3 of meer aande bespreek (oor naweke is die kampe baie gewild: Jy moet vir ten minste twee aande bespreek). Die Seditse Safari Lodge is ook deel van Moriti. Chalets: R375 p.p. (slaapplek vir 6). Halfprys vir kinders jonger as 12.

KONTAK 079 515 6357 (Adéle); moriticamp.co.za

Kokomori Birder’s Lodge 

Dian en Minda Geerkens se plek is sowat 25 km van die Groblersbrug-grenspos – jy draai van die R572 in die rigting van die rivier. Hulle het kliphuise (R400 p.p.) en ’n eksklusiewe boskampplek (R350 per voertuig p.n.) met geen geriewe nie. Dis net jy en die bos.

KONTAK 082 898 1631 (Dian); kokomori@mweb.co.za

Bateleur Tented Safari Lodge & Bush Spa 

Phillip Bronkhorst se lodge is suidoos van Lephalale naby die Palalarivier – dis ’n goeie alternatief indien jy langer in dié distrik wil bly en ’n ander deel daarvan wil verken.

Jy kan vanaand hier oornag, en dan op dag 4 van ons roete aansluit – dan loop jy nie die Limpopo-rivier mis nie. Bateleur bied wildritte, en soms word die wild langs die lodge gevoer – jy kan bier in die hand na ’n eland kyk.

Hier is 9 luukse tente vanaf R1 095 p.n. vir 2 mense (selfsorg, maar maaltye is beskikbaar).

KONTAK 082 529 5997; bateleurlodge.co.za

Die Limpoporivier soos gesien van die nuwe brug by die Platjan-grenspos af.

DAG 3: PLATJAN

Ry vir laatontbyt na die Baobab Farmstall op Marnitz, of direk Swartwater toe.

’n Lekker agterpad na Swartwater begin by die Groblersbrug-grenspos. Draai regs en volg die grondpad tussen landerye deur totdat jy weer by die R572-teerpad kom.

Moet net nie verby Swartwater ry nie – draai in. Hier is darem ’n paar strate! Neem ’n foto van die kerke, of die algemene handelaar en loer in by die koöperasie (is dit nie altyd lekker om in ’n koöperasie rond te snuffel nie?) – agter die toonbank hang los, gedroogde tabakblare as jy kans sien...

Vra toestemming om na Swartwater se Groot Kremetart te gaan kyk, want dis geleë op Joep Maree se grond (hy besit die koöperasie); dis nie ver uit die dorp nie.

Ry terug Swartwater toe en volg die pad in die rigting van Maasstroom, maar draai links af en kom op die grond-pad nader aan die rivier. Jy sien besproeiingsplase, maar ook ongerepte bos wanneer jy deur die Mmabolela-privaat-reservaat ry. Volg die pad totdat jy Boelamien-rivierkamp bereik.

Saal af, plant ’n kampstoel en trek die koelboks nader: Voor jou lê die Limpoporivier, die Bosveld se hoofslagaar.

BLY HIER

Boelamien-rivierkamp 

Volg die grondpad langs die Limpoporivier van Zanzibar-grenspos na Platjan-grenspos – Boelamien is op linkerhand kort voordat jy by Platjan kom.

Kamp: vanaf R150 p.p. Selfsorgchalet: R350 p.p.; 4 chalets het slaapplek vir 2 mense elk, die 5de chalet het slaapplek vir tot 4. 

KONTAK  082 453 8336 (Mariana, slegs WhatsApp)

Mmabolela-privaatreservaat 

Hier is twee plaashuise vir groter groepe of ’n paar gesinne. Tuli Homestead is R500 p.p. (slaapplek vir 8, minimum van 4 mense p.n.). Weederdooper Homestead is R600 p.p. (slaapplek vir 14, minimum van 4 mense p.n.).

By Weederdooper moet jy ten minste vir drie aande bespreek. Mmabolela is vir natuurfynproewers – jy kan rondstap of fietsry, want hier is nie gevaarlike grootwild nie (behalwe vir seekoeie en krokodille in die rivier). Besoek Mabalêl se Poel en die Raaswater-stroomversnelling. 

KONTAK  082 872 4397; mmabolela.co.za

Baobab-plaasstal, Marnitz

EET HIER

Baobab Farm Stall, Marnitz

Marnitz bestaan grotendeels uit die Baobab Farm Stall (wees op die uitkyk vir die geel-en-rooi windpomp). Jy kan van hier af met ’n agterpad na Swartwater se groot kremetart ry.

Baobab Farm Stall (hier is slaapplek) is een van daai lekker plekke waar jy jouself op die stoep tuismaak en vir ’n paar uur vashaak – veral as jy aan die gesels raak met die eienaars, Anél en Henk Malan.

Bestel enigiets van pizzas (die Bosveld Bielie kos R125) en ’n kaasburger (R75) tot pap-en-kaiings (R75) en wildspastei (met tjips en slaai, R54). Jy kan ook biltong en droëwors koop vir die pad wat voorlê – R260/kg.

Koop oulike geskenke soos hulle “Bosveld Uber”-T-hemde (R110). Die Bosveld Uber is ’n donkiekar – jy kan vooraf reël vir ’n rit.

Oop Ma.-Vr.: 7 vm.-6 nm.; Sa.: 7 vm.-5 nm.; So.: 7.30 vm.-1 nm.

KONTAK 082 708 1928 (Anél), baobabaccommodation.co.za

Die Blouberg-natuurreservaat is ’n Bosveldboomparadys; links voor staan ’n witseringboom.

DAG 4: BLOUBERG-NATUURRESERVAAT

Korrel reguit vir Alldays, die nie-amptelike hoofstad van die Bosveld, en gaan drink koffie of eet iets by die Delicious Coffee Shop. Maar moenie te lank draal nie, want jy is op pad na een van Limpopo se geheime.

Die Blouberg-natuurreservaat strek oor ’n deel van die Blouberg, ’n massiewe knoets van ’n berg wat amper lyk soos die Soutpansberg se stiefkind wat besluit het om weg te loop van die huis af.

In die Molope-kamp kan jy jou verlustig aan bome soos tambotie, huilboerboon, ruspeboontjie en die malvarosyntjie wat veral in die somer welig raak. Ja, hier’s haak-en-steek ook, jy’s in die Bosveld, onthou!

Elders kan jy ry tot by ’n groot kremetart, en by die Wildevywoud mag jy uitklim en ’n kort paadjie stap. Die reservaat het volop wild en by Buffelpan is ’n halfpad ondergrondse skuiling waar jy op ooghoogte met wild soos kameelperde, buffels en koedoes kan sit en foto’s neem.

Die reservaat is ook bekend vir sy groot broeikolonie kransaasvoëls – jy ry om na die suidekant van die berg om die kolonie te sien, maar aan die noordekant is ’n aasvoëlrestaurant waar ’n karkas soms uitgesit word sodat jy hulle van nader kan bekyk.

BLY HIER

Blouberg-natuurreservaat

Molope-kamp (gedeelde ablusie, geen krag): R270 p.n. vir 2 mense, R90 per ekstra persoon, R45 per ekstra kind jonger as 12 (slaapplek vir 6).

Modumele Wilderness- eksklusiewe kampplek (geen krag, puttoilet): R340 p.n. vir 2 mense, R160 per ekstra persoon, R80 per ekstra kind jonger as 12 (maksimum 10 mense).

Tamboti-tentkamp (gasstofie, gedeelde ablusie): R850 p.n. vir 4 mense, R160 per ekstra persoon, R80 per kind (slaapplek vir 8 mense).

Mashatu-selfsorghuis: R950 p.n. vir 4 mense. Dagbesoekers: R50 p.p.; R25 vir kinders onder 12 jaar.

Hektye: 6.30 vm. tot 5.30 nm. Daar is hout by ontvangs te koop, maar bring alles anders saam met jou.

KONTAK 073 068 3180 (Shadrack); bloubergreserve.co.za


Delicious Coffee Shop, Alldays

EET HIER

Delicious Coffee Shop, Alldays

Wees op die uitkyk vir hierdie oase op regterhand soos jy die dorp uit die noordweste binnery. Sit voor op die stoep, of stap deur die winkel (wat oulike geskenke verkoop, onder meer boeke en speelgoed vir kinders) na agter, waar tafels (die tafelblaaie is gemaak van ou padborde) in die kwekerydeel van die besigheid staan.

Bestel van ontbyt tot toebroodjies (die hoender-mayobroodjie met skyfies en slaai was goeie waarde teen R57) en hamburgers, vleisdisse (’n spesialiteit is hulle beesfilethamburger en skyfies, R100) en slaaie. Die melkskommels is gróót en kos R37.

Oop Ma.-Vr.: 7 vm.-5 nm.; Sa.: 8 vm.-3 nm.; So.: 8.30 vm.-2.30 nm.

KONTAK 084 235 4588; shopdelicious@gmail.com

Leeus lê tussen koorsbessiebome langs die Limpopo-rivier naby Ratho Bush Camp.

DAG 5: MAPUNGUBWE

Vandag ry jy weer Alldays toe (tyd vir nóg ’n melkskommel by die Delicious Coffee Shop...), en dan verder noord na Pontdrift.

Wanneer jy die Limpoporiviervallei nader, ry jy pragtige koppies binne – tipies aan die Mapungubwe-streek.

Slaan kamp op in die Mapungubwe- nasionale park se Mazhou-kampterrein in die westelike deel van die park, wat afgesonder is van die hoofdeel van die park.

Die Kroukamps van Centurion kamp by Mazhou in die Mapungubwe- nasionale park.

Hierdie kampplek is ’n aantrekking op sy eie – jy kan heeldag hier sit en die atmosfeer geniet. ’n Kort entjie verder is Maloutswa-skuiling wat uitkyk op ’n watergat – olifante is volop.

Besoek die museum by ontvangs en gaan kyk na die samevloeiing van die Sashe- en Limpoporivier in die groter, oostelike deel van die park. Hier kom Suid-Afrika, Botswana en Zimbabwe se grens bymekaar.

Ja, jy gaan beeste doer onder sien loop – hulle kom van Zim af. Mapungubwe is deel van ’n oorgrensbewaringsgebied en hier is nie drade wat diere (mak of wild) stop om grense oor te steek nie.

Dit het seker iets te doen met hoe ver noord jy nou in Suid-Afrika is, maar hier rond voel die Bosveld eenvoudig wilder.

Jou litte is nou behoorlik los: Geniet die veld en wat dit vir jou gee.

BLY HIER

Mapungubwe- nasionale park

Mazhou-kampterrein: R320 p.n. vir 2 mense, R100 per ekstra persoon (maksimum 6 mense).

Leokwe-ruskamp se kothuise: vanaf R1 425 p.n. vir 2 mense – R434 per ekstra persoon, of R217 per kind.

KONTAK sanparks.org

Ratho Bush Camp

Dié netjiese tentkamp kyk uit oor ’n watergat waar olifante soms gevoer word. Om daar te kom: Ry in die rigting van Pontdrift en kyk uit vir die afdraai na links. Besoek die krokodilplaas op dieselfde perseel, of gaan op ’n wildrit in die Limpoporivierbedding af.

Luukse en suite-safaritent (gemeenskaplike kombuis en kuierplek): R700 p.n. vir 2 mense.

KONTAK 082 448 7998 (Sandra); rathobushcamps.co.za 

Nthakeni Bush & River Camp

DAG 6 & 7: MUTALERIVIER

Vandag ry jy van Mapungubwe met die R572 na Musina en van daar suid tot by Bokmakierie (ja, dis ’n plek met ’n vulstasie en winkel) en dan oos na Tshipise. (Ander opsies: vat die R508 van Musina na Tshipise, of volg die grondpad van Musina al teen die Limpoporivier af – dit draai later suid en sluit weer aan by die R525-teerpad.)

Indien die Bosveld se sinkplaatpaaie jou chakra uit lit geruk het, gaan lawe jouself by Tshipise se warmwater-bron. Hulle laat ongelukkig geen dagbesoekers toe nie; as jy wil swem, moet jy ook oornag.

Anders, ry verby en volg die R525 ooswaarts vir 24 km (gemeet van Tshipise Forever Resorts af) waar jy regs draai op ’n grondpad – die bordjie sê Nwanedidam. Die uhm, avontuurlike, pad neem jou na Sagole se Groot Kremetart (GPS S22.50020 E30.63304). Dit lyk soos ’n ou olifant wat op sy knieë staan. Dis ’n heilige boom. Gaan groet ’n groot gees, neem ’n foto, en sit vir ’n rukkie stil met jou rug teen ’n boomstam wat al duisende jare hier staan.

Korrel van Sagole af na die dorpie Masisi waar jy by Juju’s Spaza Shop kan braaihoender eet (jy gaan nóg een bestel vir padkos, belowe!).

Ry verder na die Krugerwildtuin se Pafurihek. Jy kan natuurlik jou hele Bosveldvakansie in die wildtuin vertoef, maar met hierdie reisplan los ons die Kruger se wildste, verste hoek vir laaste. Maar jy gaan nie in die park slaap nie, want ons wil jou ook aan een van ons gunstelinge voorstel: Nthakeni Bush & River Camp op die oewer van die Mutalerivier, sowat 5 km van die Pafurihek af.

Die eienaars, Annelize en Kobus Venter, laat ’n mens dadelik tuis voel. Jy kan op eie houtjie ’n kort roete stap tussen die klipkoppies en verby enorme ou kremetartbome stroomaf van die kamp.

Besoek die Pafurideel van die wildtuin van hier af as dagbesoeker (Nthakeni is nader aan die Pafuristreek as die Punda Maria-ruskamp).

Hou in die park stil op die brug oor die Luvuvhu, braai of maak laatontbyt by die Pafuri-piekniekplek en maak seker jy ry al die pad tot by Crooks’ Corner.

Daarsy, nou was jy in die Bosveld!

BLY HIER

Nthakeni Bush & River Camp

Hier is twee privaatkampplekke – Mufhanda en Mushato – met hulle eie kombuisie (dis volledig toegerus vir selfsorg – ideaal indien jy nie al jou kamp-kookgoeters in jou krat saamry nie) R400 p.n. vir 2 mense, R125 per ekstra persoon. (By Mufhanda kan 6 mense slaap, en 8 by Mushato.)

Vir groter groepe is die Baobab-staanplek perfek: R300 vir 2 mense, R100 per ekstra persoon; maksimum 10 mense. Dit het twee storte en twee toilette.

Die ander twee groot staanplekke is Marula en Mutale: R350 p.n. vir 2 mense, R100 per ekstra persoon; maksimum 10 mense. Laasgenoemde twee het opwasplek, maar Baobab nie.

Die Mupani Tented Group Camp (R1 500 p.n. vir tot 6 mense) gee jou daai bosgevoel of kies Muvhuyu (2 mense, R950 p.n.) of Mulala Cottage (4 mense, R1200 p.n.) vir meer gerief.

KONTAK 078 854 9218; nthakeni.com

Tshipise Forever Resort

Dié oord het verskillende tariewe vir naweke en spitsvakansietye. Ons lys die middelweek- en buite-seisoenpryse hier (kyk op die webwerf vir volledige inligting).

Woonwapark: R330 p.n. vir 2 mense, R490 p.n. vir 4 mense, R810 p.n. vir 8 mense. Rondawel: vanaf R995 vir 2 mense (slaaplek vir 2, 4, of 6 mense).

KONTAK 012 423 5600; forevertshipise.co.za

Juju's Spaza Shop

EET HIER

Juju’s Spaza Shop, Masisi Julia Sawada se buitelug-braairestaurant (hier is sitplek onder dak) fokus op hoender gebraai oor die kole. ’n Heel hoender kos R110, half R60 en kwart R45.

Jy kry ook pap en sous saam met jou ete – groente soos marogo is ook op die spyskaart. Dis in die middel van Masisi, sowat 100 m suid van die R525. (GPS S22.42119 E30.86171)

Oop Elke dag van 5.30 vm.-6.45 nm.

KONTAK 076 708 3714 (Julia) 

Bespreek op WegReis!
Klik hier as jy ook n safari-wegbreek wil beplan.