Die Richtersveld is bekend as ’n streek wat met min oor die weg kom en heelwat gevare inhou. Deesdae is ’n deel van die gebied deur Unesco tot Wêrelderfenisterrein verklaar – ’n welverdiende beloning aan die Namas wat volhard in hulle tradisionele lewenswyse.
Die lang rit op die N7 (uit die Wes-Kaap) of N14 (uit Gauteng) is gerieflik. Die ure op die langpad gaan vinnig verby terwyl jy mik na Namakwaland en die Namakwa- nasionale park.
Jy kan die park deur verskeie hekke binnegaan, maar draai by Kamieskroon af om by die gewilde Skilpad-chalets uit te kom vir vanaand se rus. Maak eers vol by die vulstasie op Kamieskroon voor jy die grondpad na die park takel. Sodra jy afgepak het, kan jy luilekker agteroor sit en kyk hoe die son ver agter die see sak.
