Toe die inperkingsregulasies ons weer toegelaat het om te reis, het ek en my vrou, Marelize, besluit om saam met ons twee seuns, Jesse (5) en Jamie (3), én ons hond, Juno, te gaan kamp. Ons het op die internet gaan soek vir troeteldiervriendelike kampplekke en op Kleine Eike buite Greyton afgekom. Dié uitstekende kampplek het ons aangenaam verras.
Hoe lyk die kampterrein?
Die hele kampterrein is langs die Riviersonderend uitgelê en die lekker ding is almal kamp langs die water. Hier is 14 staanplekke van wisselende groottes, elkeen met ’n kragpunt, kraan, piekniekbankie en braaiplek. Hier kan sowat 120 mense inpas en die kampterrein is só uitgelê dat niemand voor iemand kamp nie. Die ding wat egter vir ons belangrik is, is die feit dat ons hond, Juno, mag saamkom. Jy moet net die oordmense vooraf laat weet.
