Ek en my vrou, Antoinette, het die afgelope Kersfees ons wa se hoekstutte by Weltevrede buite Parys uitgedraai en vir ’n klompie dae kom uitspan. Ons was seker al ’n goeie vyf keer hier en sal aanhou terugkom. Dit is ’n agtermekaar oord op die Fochvillepad en die eienaar hou streng by sy reëls en hou die plek netjies.

Die laaste 3 km of so tot by die oord is ’n goeie grondpad wat glad nie pla wanneer jy sleep nie.

Hoe lyk die kampterrein?

Hier is meer as 30 staanplekke langs die Vaalrivier uitgelê en almal van hulle is onder dak en op plaveisel. Elke staanplek het ook sy eie braaiplek. In die voorste ry staanplekke is nagenoeg 10 staanplekke sowat 50-60 m van die water af. Jy kan amper by jou bed uitrol tot in die water.

In die middelste ry is nog ongeveer 10 staanplekke en dan is daar ’n verdere 10 of so. Daar is krag by die staanplekke en danksy die plaveisel sukkel jy nie om jou wa gelyk te trek nie. Hier is ook ’n klompie selfsorghuisies te huur vir jou vriende wat nie kamp nie.

Was julle tevrede met die ablusiegeriewe?

Ja, meer as tevrede. Hier is twee ablusieblokke wat drie keer per dag skoongemaak word. Jy kry nooit spitsverkeer nie en danksy die gasgeisers raak die warm water ook nie op nie. Die geriewe is baie mooi, netjies en skoon.

Watter aktiwiteite is hier om mense besig te hou?

Die groot attraksie is natuurlik die rivier waar jy kan visvang. Veral vir mense wat lief is vir kunsvlieghengel, is dit ’n gawe plek, want op die een punt is daar baie rotse wat bo die water uitsteek.

Verder is hier ’n verhitte swembad, ’n aparte kouewaterswembad met ’n glyplank, ’n minigholfbaan en vir die kinders trampoliens en swaaie.

Is hier ’n winkel?

Ja, hier is ’n winkeltjie waar jy basiese dinge soos hout, ys en koeldrank kan aanskaf, maar as jy iets anders nodig het, is Parys skaars 14 km weg.

Wat kos dit om hier te kamp?

Hulle is baie billik met hulle pryse, iets wat vir ons ’n groot oorweging was toe ons oor Kersfees kom kamp het. Dit kos R310-R360 p.n. per staanplek vir 2 mense, afhangend van wanneer jy kamp. Bykomende kampeerders betaal R100-R110 p.p.p.n., en as jy kuiermense kry, mag hulle ook oorslaap teen R110-R130 p.p.p.n. Vir kinders tussen 2 en 4 jaar kos dit R25 p.n. en dan word ’n administrasietarief van R70 per bespreking gehef.

Nols wen ’n Camp Cover Bundu-sak van R400.

Gaan kyk na hulle puik beskermende oortreksels op die webwerf

campcover.co.za