Viskoekies
So maklik!

Viskoekies is net die ding vir ’n vinnige middagete. Jy kan enige geblikte vis (of ’n kombinasie van verskillende soorte) gebruik – ek hou van salm.

Jy benodig
• 1 blik (212 g) salm
• vars vinkel en pietersielie, fyngekap
• sout en peper na smaak
• 2 eiers
• ’n hand vol broodkrummels
• olyfolie
• botter

Só maak jy
1 Dreineer die salm, skep die vis uit die blikkie en druk dit met ’n vurk fyn.
2 Sprinkel die kruie oor, geur die vis met sout en peper en meng alles dan goed deur.
3 Klits die eiers en voeg dit by die vis.
4 Gooi die broodkrummels bietjies-bietjies by totdat die mengsel hanteerbaar is. Moenie te veel gebruik nie.
5 Sit die mengsel vir ongeveer 10 minute in die yskas sodat die krummels kans kry om die vog te absorbeer.
6 Verhit ’n bietjie olie en botter in ’n pan en braai eetlepels vol van die mengsel vir sowat 2 minute aan elke kant.
7 Pak die viskoekies op kombuispapier sodat die vet geabsorbeer kan word en sit dit warm voor saam met ’n slaai.

WegSleep sê: Sardientjies en tuna werk ook goed. En as jy nog van gisteraand se vis oor het, haal die grate uit en voeg dié vleisies ook by jou mengsel.