Vir 4-6

Voorbereityd 20 minute, plus oornag marineertyd

Gaarmaaktyd 1 uur 15 minute

Jy benodig

  • 1 heel hoender (van sowat 1,5 kg)
  • 2 rooiuie in dik ringe gesny
  • 12 klein worteltjies
  • 1 bossie radyse, deeglik gewas
  • 200 g vlapampoentjies, gehalveer

Vir die marinade

  • 2 koppies karringmelk
  • 2 eetlepels olyfolie
  • ’n duim vars gemmer, gerasper
  • 3 knoffelhuisies, fyngekap
  • ’n ruim knippie gedroogde rissievlokkies
  • 1 teelepel seesoutvlokkies
  • 1 teelepel borrie
  • 1 eetlepel kerriepoeier

Só maak jy

1 Sny met ’n skerp mes twee diagonale kepies in elke borsie en een in elke dytjie en boudjie. Meng al die marinadebestanddele saam en vryf die hoender buite én binne goed daarmee in. Maak seker die geur kom in al die insnydings. Sit dit in ’n glasbak, bedek en laat oornag in die yskas marineer.

2 Rangskik die uieringe onder in ’n groot weggooibare foeliebak. Plaas die hoender borskant na bo op die uielaag. Laat die hoender tot kamertemperatuur rus.

3 Kry die ketelbraai gereed vir die indirekte braaimetode met genoeg kole aan weerskante van die middelbaan om meer as 1 uur se goeie hitte te gee.

4 Tel die foeliebak in die ketelbraai oor, giet ’n halwe koppie water onderin die bak en sit dan die braai se deksel op met die ventilasie-gaatjies driekwart oop. Braai vir sowat 45 minute.

5 Voeg nou die groente by die pan en draai die hoender om sodat die rugkant ook kleur kan kry voordat jy weer die deksel opsit en dit vir nog 30 minute braai totdat die sappe helder en bloedloos uitloop wanneer jy ’n mespunt in ’n dytjie steek. Die groente behoort ook nou gaar en heerlik rokerig te wees. Al wat die dis nog kortkom, is ’n finale strooiseltjie sout en peper!

Wenk Jy kan die heel hoender ook teen 180 °C oondrooster. Onthou om die vleis te laat rus voor jy dit in porsies sny.