Klappermelkpannekoek met chakalaka-maalvleis

Pannekoek vir Afrika!

Jy benodig

(genoeg vir 8)

• 1 blik (400 ml) klappermelk, geskud
• 1/3 koppie kookolie
• 2 eiers, geklits
• 1 koppie bruismeel
• 1 teelepel suiker
• 1 eetlepel gekapte grasuie (opsioneel)

VIR DIE VULSEL

• 350 g maalvleis
• 1 eetlepel olie
• 1 blik (410 g) chakalala (ons het Koo se Mild & Spicy gebruik)
• 1 koppie gerasperde cheddar

Só maak jy

1. Klits die klappermelk, olie, eiers, meel, sout en suiker saam tot ’n gladde beslag. Roer die grasuie by en laat staan dit vir 15 minute.

2. Verhit ’n middelslag-pan wat jy met kleefwerende kossproei spuit, en skep met ’n soplepel ’n bietjie beslag in die pan (maak seker die pan se hele boom is bedek). Bak die pannekoek vir ’n minuut of twee, draai hom om en bak die ander kant. Herhaal die proses tot al die beslag opgebruik is.

3. Maak die vulsel Verhit die olie in ’n tweede pan en braai die maalvleis bruin. (Gebruik die olie spaarsaam, want die chakalaka is ook ryk.) Breek die maalvleis die heeltyd met jou spaan op in korreltjies. As die maalvleis mooi goudbruin is, roer die chakalaka by en verhit die mengsel tot deurwarm.

4. Verdeel die maalvleis tussen die pannekoeke, rol dit op, sprinkel kaas oor en geniet dit.