Foto Ed O’Riley

Jy benodig (maak 12 stafies)

  • ¼ koppie kookwater
  • 1 koppie styfgepakte dadels
  • ¼ koppie heuning
  • ¼ koppie onversoete grondboontjiebotter
  • 1½ koppie gerolde hawermout, gerooster
  • ½ koppie klapper
  • 100 g gemengde neute, grofgekap
  • ’n hand vol droë piesangskyfies of appelkosies

Só maak jy

1 Smeer ’n vierkantige pannetjie van 23 x 23 cm met botter of, nóg beter, voer dit uit met waspapier.

2 Giet die kookwater oor die dadels en laat dit vir 5 minute afkoel. Gooi die dadelmengsel, heuning en grondboontjiebotter in die bak van ’n voedselverwerker en pols dit tot dit amper soos ’n deeg begin bymekaarkom.

3 Skep die dadels uit in die mengbak, voeg die res van die bestanddele by en meng alles goed deur. Skep die mengsel in die voorbereide pannetjie en druk dit oraloor plat om dit te kompakteer. Bedek die pannetjie en hou dit in die yskas tot die mengsel ferm is. Sny dit in stafies en hou hulle in ’n lugdigte houer wat jy op ’n koel plek bêre.

Ry & Sleep sê Strooi ’n ekstra lagie klapper oor die stafies om die taaiheid te verminder – vir ekstra geur kan jy die klapper in die oond rooster.