Jy benodig (genoeg vir 8)

  • 1 pakkie (500 g) splitertjies, afgespoel en gedreineer
  • 1 ui, grofgekap
  • 3 selderystingels, gekap
  • 2 wortels, gekap (of gerasper)
  • 1 gerookte varkskenkel (eisbein) van 450 g
  • 2 groot aartappels, in blokkies gesny
  • 2 liter hoenderaftreksel
  • 1 pakkie (250 g) bevrore ertjies

Só maak jy

1 Meng al die bestanddele vir die sop behalwe die bevrore ertjies in ’n groot pot, verhit dit tot kookpunt en verlaag dan die hitte sodat die mengsel stadig prut. Kook die sop met die deksel halfmas daarop vir sowat 3 uur. Skep enige skuim af wat bo-op vorm en gooi dit weg.

2 Skep die smeltsagte varkskenkel uit die sop en maak die res van die sop met ’n staafmenger of sommer met ’n aartappeldrukker fyn. Roer die bevrore ertjies by en verhit dit solank terwyl jy die vleis van die been af vlok.

3 Roer die gevlokte varkvleis terug by die sop en prut alles vir nog ’n paar minute saam tot die ertjies sag is. Die ekstra ertjies gee kleur en so ’n bietjie tekstuur aan die sop, maar is opsioneel. Proe – vir my geur die aftreksel en gerookte vark die sop só lekker dat sout en peper onnodig is, maar besluit self. Sit die sop stomend warm voor met ’n broodjie daarby.

Ry & Sleep sê As jy nóg meer moeite wil spaar, koop ’n klaarbereide pakkie opgesnyde sopgroente, dan hoef jy nie eens die uie vir die sop te kap nie.