As ’n sopie whisky in die sous nie vir jou nie is nie, gooi die laaste bietjie moerkoffie uit die kan by die karamel of gebruik ’n knertsie vanieljegeursel. Dis ook die moeite werd om jou elektriese klitser saam te neem op vakansie om die meringue te maak – ’n ballonklitser is gans te veel oefening! 

1. Voorverhit die oond tot 160 ºC. Week die sago vir 1 uur in 250 ml melk. Roer die botter, 250 ml suiker, room, whisky en seesout saam in ’n kastrolletjie oor matige hitte tot opgelos en kook dit dan vir sowat 5 minute tot karamelkleurig.

2. Voeg die sago en die res van die melk by die karamelmengsel en laat dit prut totdat die sagokorrels deurskynend is. Dit is belangrik om aanhoudend te roer sodat die melk nie aanbrand nie. Laat die vla effens afkoel en klits dan die eiergele by.

3. Skep die mengsel in ’n gesmeerde vuurvaste oondbak. Sit die oondbak binne-in ’n groter, diep roosterpan en vul dié met warm water totdat die oondbak halflyf in die water staan.

4. Klits die eierwitte tot dit sagte punte vorm en voeg dan die oorblywende suiker lepel vir lepel by tot die mengsel blink en styf is. Skep dit bo-op die vlapoeding en bak die poeding vir sowat 40 minute in sy waterbed (die ghrênd naam is ’n bain-marie) totdat die meringue se punte goudbruin is.

WENK

Nie ’n oond by die vakansiehuis nie? Roer dan die sagovla en eiergele in ’n swartpotjie oor die kole of op ’n gasstofie tot dik. Verdeel dit in enkelporsie-bakkies, skep meringue bo-op elke porsie en gebruik ’n blaasvlam om dit te karamelliseer. Nóg makliker: sit die sago voor met skuimpies uit die winkel of ’n skeppie roomys