Johané Neilson
Varknek het goeie marmervet en werk uitstekend met die sterk geure van hierdie vryfmengsel.
Vleispaleis
Jy benodig
(genoeg vir 4)
- 1 teelepel komynsaad, gekneus
- 2 teelepels koljandersaad, gestamp
- 1 opgehoopte eetlepel gerookte paprika
- 1 teelepel mosterdpoeier
- 2 teelepels bruinsuiker
- 1 teelepel fyn wonderpeper
- 1 teelepel grofgemaalde swartpeper
- 1 eetlepel seesoutvlokkies
- 1 teelepel droë origanum
- 4 groot ontbeende varkneksteaks
Só maak jy
1. Meng al die speserye saam en vryf die vleis oraloor daarmee in. Marineer dit vir sowat 3 uur in die yskas. (Onthou, die vleis moet weer kamertemperatuur wees voor jy braai.)
2. Braai die vleis oor warm kole tot dit ’n mooi gekaramelliseerde kors kry – pasop net dat die suiker nie skroei nie. Sodra die vleis kleur het, skuif dit verder van die kole af sodat dit deurgaar kan word. Draai die vleis die heeltyd om soos nodig.
Weg Ry & Sleep sê
As jy die steaks ’n bietjie glans wil gee, meng ’n eetlepel elk appelkooskonfyt, tamatiepuree en worcestersous saam en verf dit aan net voor jy die vleis van die kole afhaal.
