Foto Shelley Christians

Vir 8 bekerpasteie, met oorskiet  

Voorbereityd 40 minute

Gaarmaaktyd 4 uur vir die vulsel, 30 minute vir die kors

Jy benodig

  • 1,5 kg wildsvleis (ek het springbokboud gebruik), in 2,5 cm-blokkies gesny
  • 4 dik repe gerookte spek (rashers), gekap
  • 1 ui, grofgekap
  • 6 naeltjies
  • 1 teelepel fyn koljander
  • 1 teelepel heel swartpeperkorrels
  • 1 koppie rooiwyn
  • ¼ koppie balsemiekasyn
  • ’n knippie neutmuskaat
  • sout en peper na smaak
  • ½ koppie room
  • 2 teelepels aartappelmeel of mielieblom

Vir die slap deeg

  • 1 koppie groenteolie
  • 1 koppie melk
  • 2 eiers
  • 2 eetlepels gekapte pietersielie
  • 1 koppie bruismeel
  • sout en peper na smaak

Só maak jy

1 Kook al die vulselbestanddele behalwe die room en aartappelmeel stadig saam totdat die vleis sag maar nie droog is nie – dit moet maklik kan vlok. Moenie haastig raak nie – hierdie is ’n lang storie. As jy wel haastig is, kan jy ’n drukkoker inspan.

2 Vlok die vleis, skep dit terug in die pot en voeg die room by. Verhit die vulsel tot deurwarm en verdik dit met ’n bietjie aartappelmeel of mielieblom. Laat dit afkoel.

3 Voorverhit die oond tot 180°C. Vir individuele pasteitjies vul jy 8 gesmeerde blikbekers net meer as halfvol met die wildspasteivulsel (hou porsiegrootte in gedagte en los genoeg plek vir die kors wat effens gaan rys). Andersins kan jy doodeenvoudig al die vulsel in ’n vuurvaste pasteibak skep. (Die oorskietvulsel geroer deur pasta smaak heerlik! Jy kan dit ook saam met kappokaartappels en groente voorsit of selfs in ’n jaffel gebruik én dit vries goed!)

4 Klits die olie, melk, eier en kruie saam en voeg die meel dan geleidelik om terwyl jy aanhou klits tot ’n gladde beslag vorm. Geur na smaak met sout en peper en verdeel tussen die bekers, of giet oor die groot pastei. Die kors moet omtrent 1,2 cm dik wees. Bak vir 30 minute of tot goudbruin en gaar. (’n Groot pastei mag ’n bietjie langer neem.) Die pasteitjies is heerlik saam met blatjang.  

WENK

As jy tyd het, is dit altyd wenslik om rou wildsvleis oornag in ’n koppie of twee karringmelk te laat lê om die vleis sag te maak en ook daardie wilde smaak te temper. Gooi die karringmelk af en vee die vleis met handdoekrol skoon voor dit pot toe gaan.