Foto’s James Garaghty

Een van die eerste dinge wat jy doen wanneer jy by die kampterrein opdaag, is om jou lêplek vir vanaand gereed te kry. Enige van hierdie elf bekostigbare slaapsakke sal dié takie aansienlik vergemaklik. Hulle wissel in grootte, vorm en temperatuurgradering, maar een van hulle behoort nommerpas vir jou te wees.

Oztrail Nullabar-dubbelslaapsak

Kom ons gaan lê, Mamma

OZTRAIL NULLABAR-DUBBELSLAAPSAK
OZTRAIL NULLABAR-DUBBELSLAAPSAK

As jy en jou ander helfte daarvan hou om styf langs mekaar te slaap – en die een snork die ander nié uit die kooi uit nie – is hierdie die slaapsak vir julle. Omdat sy bolaag van katoen is, is daar ook nie die geraas wat iets soos poliëster maak as jy in die middel van die nag omdraai nie.

Die voering is van Skotse geruite wolstof wat sag en gemaklik is.

Oztrail sê jy kan heel rustig slaap teen die vriespunt, en dit selfs waag in -5 ºC, veral omdat daar twee lywe is wat hitte afgee.

Prys: R2 420 by Takealot.

Afmetings: 2 150 x 1 600 mm

Gewig: 4,7 kg 

Weg Ry & Sleep sê
Jy kry twee dun kussings saam waarmee jy behoorlik kan insluimer.

K-Way Traverse 2 Cowl-slaapsak

Veeldoelig

K-Way_Traverse
K-Way_Traverse

Hierdie slaapsak van Cape Union Mart is geskik vir alle weerstoestande en is veral op stappers gemik – hy is lekker lig en bevat 280 g mikroveselvoering per vierkante meter (280 gsm).

Hy is 100 mm smaller by die voete as by jou skouers, en daar’s ’n kappie bo wat help teen erge koue. Die vervaardiger sê jy sal gemaklik slaap in temperature van 10-15 ºC.

Prys: R700 by Cape Union Mart.

Afmetings: 2 200 x 750 mm

Gewig: 1,9 kg

Weg Ry & Sleep sê
Die buitenste laag is van skeurvrye nylon en voel duursaam.


Camp Master Expedition 300C

Swart en rooi

Dit is een van die topprodukte in Camp Master se slaapsakreeks. Die 300C is ook een van die duurder keuses, maar met goeie rede. Camp Master sê jy kan gemaklik teen -5 ºC slaap en selfs temperature van tot -15 ºC oorleef danksy die 300 gsm-veselpoliëstervoering.

Prys: R700 by Makro.

Afmetings: 2 300 x 850 mm

Gewig: 2 kg 

Weg Ry & Sleep sê
Hierdie meneer lyk nie net taai nie; hy ís so taai soos ’n ratel. 

Tentco Bundu

Plaaslik en prettig

Hierdie is jou meer tradisionele soort slaapsak met sy gebruiklike reghoekige ontwerp. Met sy 350 gsm-stoffering is hy ’n dik meneer, wat beteken hy is groot, selfs opgerol in die sak. Maar jy kan in temperature van tot -3 ºC slaap sonder om koud te kry.

Prys: R500 by Camp & Climb.

Afmetings: 2 200 x 1 000 mm

Gewig: 2,5 kg 

Weg Ry & Sleep sê
Die Bundu is sterk, duursaam en uitstekende waarde vir geld.

Camp Master Voyager 200E

Goedkoop en gaaf

Die Voyager is nie net liggewig nie, maar ook die goedkoopste slaapsak op dié blaaie. En met sy 200 gsm-veselpoliëstervoering is hy meer geskik vir warmer temperature – tot 15 ºC, volgens die vervaardiger.

Hy het ’n helderoranje poliësterbolaag, wat beteken jy kan maklik die goggas raaksien voor jy inkruip.

Prys: R300 by Makro.

Afmetings: 1 900 x 800 mm

Gewig: 1,2 kg 

Weg Ry & Sleep sê
Hy is lig op die beursie, maar bied steeds goeie waarde.

Camp Master Berg 300C

Snoesig vir slaap

Hierdie is een van die gemaklikste slaapsakke op die mark danksy die voering van Skotse geruite wolstof, soortgelyk aan dié van Oztrail se produkte.

Met sy 300 gsm-binnelaag is hy ook geskik vir temperature van so laag as -3 ºC.

Prys: R650 by Game.

Afmetings: 2 300 x 850 mm

Gewig: 2,4 kg 

Weg Ry & Sleep sê
Omdat hy so ’n dik binnelaag het, neem hy baie plek op in jou bagasiebak.

Oztrail Alpine View

Sneeubestand

Hier is een vir iemand wat nie skrik vir selfs die koudste weer nie, want met die Alpine View kan jy temperature van tussen -7 ºC en -12 ºC oorleef. Dit is ysig koud.

Hy het ook buise oor die ritssluiter om enige koue wat dalk daar mag inglip uit te hou, en sy voering is heerlik sag en snoesig.

Prys: R1 150 by Takealot.

Afmetings: 2 200 x 800 mm

Gewig: 2,6 kg 

Weg Ry & Sleep sê
As jy twee Alpine View-slaapsakke het, kan jy hulle aan mekaar vasrits om een dubbelsak te vorm.

Oztrail Treksmart2- slaapsak met kappie

Net die kop steek uit

Hierdie slaapsak met sy kappie vou om jou soos ’n kokon, wat beteken net jou gesig gaan uitsteek as jy hom ordentlik toerits. Die materiaal is nie die dikste hier nie, maar hy is nietemin opgewasse vir temperature so laag as die vriespunt.

Prys: R1 415 by Takealot.

Afmetings: 2 200 x 570 mm

Gewig: 1,2 kg 

Weg Ry & Sleep sê
Wanneer jy hom in sy sakkie oprol, is hy maar 300 mm lank met ’n omtrek van 170 mm.

First Ascent Amplify 900

Dun om die lyf

Dis ’n klein slaapsak wat kompak oprol, maar steeds sy man kan staan teen winterweer. Volgens die vervaardiger kan jy met gemoedsrus in temperature van tot -7 ºC slaap danksy die silwer laag tussen die bolaag en voering wat die hitte na jou lyf toe terugweerkaats.

Prys: R1 500 by Camp & Climb.

Afmetings: 2 100 x 800 mm

Gewig: 1 kg 

Weg Ry & Sleep sê
Die slaapsak raak aansienlik smaller by jou voete en is nie regtig geskik vir lywige ouens nie.

AfriTrail Plover-slaapsak

Tevredenheid gewaarborg

Hierdie een se prys sal by baie mense aanklank vind – en dan kan jy boonop in bibberweer met hom kamp.

AfriTrail sê sy voering is van só aard dat jy selfs by die vriespunt nie enige ongemak behoort te verduur nie.

Prys: R450 by Takealot.

Afmetings: 2 300 x 900 mm

Gewig: 1,5 kg 

Weg Ry & Sleep sê
Hy word vir 24 maande gewaarborg, wat heel indrukwekkend is as jy sy prys in ag neem.

K-Way Alpine Cowl-slaapsak

Koel komkommer

Hierdie meneer is geskik vir die koeler herfs- en wintermaande. Met die Alpine Cowl se 150 gsm-mikroveselvoering is jy doodseker jy gaan lekker slaap teen 6 ºC, maar K-Way sê jy behoort teen die vriespunt ook nie probleme te hê nie.

Prys: R1 100 by Cape Union Mart.

Afmetings: 2 300 x 800 mm

Gewig: 1,8 kg 

Weg Ry & Sleep sê
Die voering in die binnekant kan apart met ’n tou styfrek om jou lyf van die nek af ondertoe te isoleer.