LEISUREQUIP-STRANDSAK

Pak jou tas

Jy hoef nie soos ’n pakesel te lyk as jy die eet- en drinkgoed saamdra strand toe wanneer die kinders gaan swem nie. Met dié strandsak is daar plek vir alles. Bolangs is plek vir jou sandale, elektroniese katoeters, sonroom, bril en ’n groot pak tjips.

Die onderste deel van die sak maak met ’n ritssluiter toe en is uitgevoer met ’n aluminiumfoelielaag waar jy die versnaperinge vars kan hou. Buiten groen is die sak ook in oranje en blou beskikbaar.

Prys: R200 by Makro.

Ry & Sleep sê: Die sak het genoeg plek vir tien koeldrankblikkies wat jy koud kan hou met LeisureQuip se ysblokke.

LUME- OUTOMATIESE KOFFIEMEUL

Koffiekapitaal

Wanneer jy in die middel van die Savuti is, kan jy nie gou by jou gunstelingkoffiewinkel stilhou waar João, die barista, jou cappuccino aanmekaarslaan nie. Dit beteken egter nie jy moet sonder ’n ordentlike koppie koffie klaarkom nie. Met dié outomatiese koffiemeul van Lume gaan jou varsgemaalde oggendbederfie oral saam met jou.

Maar dit is nie nét ’n koffiemeul wat tot 45 g koffiebone op ’n slag kan maal nie; hy het ook ’n ingeboude 150 lumen-flits.

Prys: R1 470 by Yuppiechef.

Ry & Sleep sê: Jy laai hom met ’n USB-kabel en kan jou oog op die ingeboude battery hou danksy vier blou LED-liggies aan die voorkant.

COGHLANS-EIERHOUER

Eiers by dosyne!

Wat is ’n kampontbyt sonder spek en eiers? Die enigste probleem is om daardie eiers te vervoer, veral as jy ’n lang stuk grondpad moet baasraak.

Met dié eierhouer kan jy ’n bietjie meer gerus wees. Die vervaardiger beweer die eiers sal ongeskonde bly selfs al stamp jy per ongeluk die houer van die tafel af. Jy word wel beperk met die grootte van die eiers – die jumbo-grootte pas nie in nie.

Prys: R72 by Camp & Climb.

Ry & Sleep sê: Die eierhouer is taamlik stewig – selfs al gaan sit jy daarop, sal hy nie breek nie.

ALVA PREMIUM-ROOSTERSTEL

Skoon en netjies

Dis alles goed en wel as daar ’n braaiplek op jou staanplek is, maar dit kan ook gebeur dat die rooster al beter dae geken het en jy voor jou siel weet jy speel met jou gesondheid as jy daarop gaan braai.

Met hierdie stel kan jy daai bedenklike rooster egter vinnig regsien in ’n noodgeval. Die skraper het ’n lang handvatsel en die staalborsel skroef ook aan die handvatsel vas.

Prys: R400 by Cape Union Mart.

Ry & Sleep sê: Die stel sluit ’n tweede borselkop in. Praat van waarde vir geld. 

HOMEQUIP FIRE OUT-BRANDBLUSSER

Blus die vlamme

’n Mens moet altyd versigtig wees vir brandgevaar wanneer jy kamp. Tussen jou kampgoed is daar altyd ’n klomp dinge wat maklik kan vlamvat, veral as jy goed soos ekstra brandstof en ’n gassilinder saamry. Daarom is dit belangrik om altyd ’n brandblusser by jou te hê. Maar as jy nóg veiliger wil wees, kan jy ook een van hierdie kannetjies in die ammokis hou.

Hy is niks groter as ’n gewone blik Mr Min nie, wat beteken hy vat nie baie plek nie. Hy word gevul met ’n bioafbreekbare stof wat die vlamme smoor deur dit van suurstof te ontneem, en werk binne ’n oogwink.

Prys: R60 by Makro.

Ry & Sleep sê: Die verskillende simbole verwys na verskillende soorte vuur. Hierdie blik is geskik vir A- (papier of hout), B- (vloeistowwe) én F-vuur (kookmiddels soos vet en olie).

LEISUREQUIP-KOELSAK VIR 40 BLIKKIES

Grootmeneer

Hierdie is die koelsak wat jy wil hê wanneer jy saam met die skool se eerste én tweede rugbyspan gaan kamp. Hy het genoeg plek om ’n blikkie koeldrank vir elke speler, die afrigters, skeidsregter én vlagmanne te neem. Jy hoef hom natuurlik nie net met blikkies te laai nie; hy werk ewe goed vir eetgoed en ys.

Hy is groter as LeisureQuip se gewone koelsakke en word van duursame materiaal gemaak wat opgewasse is teen die stampe en stote van jou alledaagse bestaan. Hy het ook ’n gaassakkie langsaan vir die karsleutels en jou boek.

Prys: Vanaf R360 by kleinhandelaars.

Ry & Sleep sê: Verskillende groottes is beskikbaar as hierdie meneer effens te groot of te klein is vir jou behoeftes. Dit wissel van sakke met plek vir 8 blikkes tot een wat ’n allemintige 70 blikkies kan vat.

COGHLANS-OPVOUWATERTENK

Waterdraer

Heelwat Suid-Afrikaners het in die laaste klompie jaar een of ander waterkrisis beleef, en teen dié tyd het die meeste van ons een of ander vorm van waterbergingshouer. Die probleem is dat hulle groot is en baie plek opneem wanneer jy dit wil inpak om te gaan kamp.

Hierdie opvouwatertenk hou ’n aks minder as 19 l en is net die antwoord. Hy word van BPA-vrye plastiek gemaak en het handvatsels waaraan jy hom maklik ronddra. Maak hom vol, sit hom op die tafel met die tuit wat vorentoe wys, en jou water is altyd naby, selfs al is die kraan ver.

Prys: R300 by Camp & Climb.

Ry & Sleep sê: Dit is ’n uitdaging om hom weer op te vou dat hy lyk soos toe jy hom die eerste keer uit die boks gehaal het, maar andersins werk hy heel gaaf.

SNOWVA-YSMAKER

’n Klingel in die glas

Dit lyk dalk soos ’n bak van jou gunsteling- Italiaanse gelato, maar binne-in is ’n rak van silikoon waarmee jy moeiteloos tot 80 ysblokkies in jou kampvrieskas kan maak. Jy plaas bloot die rak in die bak, tap hom tot by die lyn vol water en sit die deksel stewig op.

Ná ’n paar uur, afhangend van hoe koud jou vrieskas gestel is, haal jy die bak uit en laat hom vir vyf minute ontdooi. Knak die bak versigtig heen en weer en haal die silikoonrak uit. Knak dié outjie en jou ysblokkies (33 mm lank en 22 mm breed) is gereed.

Prys: R250 by Makro.

Ry & Sleep sê: Jy kry ook twee stewige plastieksakke waarin jy die ys kan uitgooi sodat jy solank met jou volgende besending kan begin.

STANLEY-KOSFLES

Lus vir ’n happie? Dit is altyd ’n kopseer wanneer jy moet besluit wat om met die oorskietkos te doen, maar hierdie kosfles kan daardie hoenderboudjie warm hou tot wanneer jy later voel of jy weer ’n ietsie kan eet.

Die fles seël nes ’n gewone koffiefles en lyk boonop soos een, maar die groot verskil is dat hier genoeg plek is vir ’n ete. Jy kry ook een van daai plastieklepels met die tandjies – ’n “spork”, noem die Engelse hom – én daar’s ’n aparte deel waar jy die tamatiesmoor kan hou. Dit is regtig ’n indrukwekkende produk en nommerpas vir die kampterrein.

Prys: R830 by Camp & Climb.

Ry & Sleep sê: As jy mooi na hom kyk, behoort hy jou ’n leeftyd te hou.

THE FAMOUS LEKKE HOT POT

Perfekte braaimaat

Dit is nou maar net hoe kamp en avontuurreis werk: Daar’s nooit genoeg plek om al jou kos op een slag gaar te kry nie. Soms is die rooster klein en jy moet die boerewors vóór die tjops braai. Dié pot het ’n dubbele wand van vlekvrye staal en ’n unieke sluitstelsel waarmee jy jou kos seël en vir tot ses uur warm en vars kan hou.

Maar hy werk ook ewe goed om kos soos slaaie, jogurt of roomys koel te hou. Ons het hom selfs as ’n ysbak gebruik en hy het besonder goed gewerk. Hy is in verskeie groottes beskikbaar om by jou behoeftes te pas.

Prys: Vanaf R229 by The Lekke Company.

Ry & Sleep sê: Jy kan nie die Hot Pot gebruik om te kook nie. Moet dus nie die mieliepap op die gasstoof hierin maak nie.

KRY DIE PRODUKTE HIER

Camp & Climb, campandclimb.co.za

Cape Union Mart, capeunionmart.co.za

Yuppiechef, yuppiechef.com

The Lekke Company, thelekkeco.co.za

Makro, makro.co.za