Laasnag het ’n Afrikaanse naguil sy roep kom tjorrel uit een van die maroelabome wat Ndumo se ruskamp vol staan. Van tyd tot tyd het ’n maroelavrug – met ’n klipharde tok! – op die dak van een van die nabygeleë huisies geval.
Niks hiervan het my wakker gehou nie; inteendeel, dit het my laat glimlag met die wete dat ek vir die eerste keer in meer as tien jaar weer in een van Suid-Afrika se uitsoekplekke is.
Die Ndumo-wildreservaat se unieke geografie en plantegroei maak dit ’n puik habitat vir baie voëlspesies wat gewoonlik net in Mosambiek en verder noord in Afrika gesien word. Dis laagliggend (omtrent 80 m bo seevlak by die ruskamp, en skaars 30 m bo seevlak by Nyamithipan), warm en nát – die jaarlikse reënval is gemiddeld meer as 650 mm.
