Vir 4 | Voorbereityd 10 minute | Gaarmaaktyd 30 minute
Jy benodig
• 1 kaneelstokkie
• 2 groen kardemompeule
• 3 eetlepels botter of olie
• 1 teelepel komynsaadjies
• ½ ui, in ringe gesny
• 2 aartappels, in blokkies gesny
• 1 teelepel borrie
• 1 eetlepel kerriepoeier
• 6 knoffelhuisies, fyngekap
• 2 cm vars gemmer, geskil en gerasper
• 1 blikkie (410 g) tamatiepuree (of ’n blikkie gekapte tamaties)
• 1 blokkie groenteaftreksel
• 3 koppies bevrore ertjies
• 1½ teelepels garam masala
• 2-4 eetlepels ongegeurde jogurt
Só maak jy
1. Plaas die kaneel en kardemom in ’n wye pan en rooster droog tot geurig. Voeg nou die botter of olie daarby, en braai die komynsaadjies en ui saam met die speserye. Roerbraai totdat die uie begin verkleur.
2. Voeg die aartappelblokkies, borrie en kerriepoeier daarby en roerbraai vir sowat 5 minute. Voeg die knoffel, gemmer, tamatiepuree en groenteaftreksel by en laat prut vir 5 minute.
3. Voeg 1 tot 2 koppies water by totdat die aartappels bedek is, bring tot kookpunt, en laat prut totdat die aartappels sag is. Roer die ertjies, garam masala en jogurt ’n paar keer deur totdat die ertjies warm is.
