Sriracha-sosaties

akkreditasie
Sriracha is ’n baie veelsydige Thaise rissiesous wat jy in jou supermark op dieselfde rak as die sojasous behoort te kry. Jy kan die sriracha vervang met dieselfde hoeveelheid gekapte vars brandrissie na smaak of ’n ander rissiesous van jou keuse.

Vir 6 | Voorbereityd 15 minute| Gaarmaaktyd 6 minute

Jy benodig

• 500 g lamsmaalvleis

• 4 sprietuie, fyngekap

• 1 eetlepel mentblare, fyngekap

• 3 cm vars gemmer, gerasper

• 2 eetlepels srirachasous

• 1½ eetlepel vissous (of gebruik sojasous)

• 1 teelepel suiker

• ½ teelepel seesout

• ¼ teelepel gemaalde swartpeper

• 1 bossie ekstragroot ment of basilieblare

• olyfolie

• 6 bamboes- of houtsosatiestokkies, in water geweek

Vir die doopsous

• 3 eetlepels heuning

• 3 eetlepels lemmetjiesap

• 1 eetlepel gekapte sprietuie

• 1 eetlepel vissous (of sojasous)

• 1-2 teelepels srirachasous

Só maak jy

1 Meng die lamsvleis baie goed met al die bestanddele behalwe die ekstra ment- of basilieblare en die olyfolie. Maak eetlepelgrootte bolletjies met die maalvleis en rol elkeen met ’n ment- of basilieblaar toe.

2 Ryg 4-5 vleisbolletjies op elke sosatiestokkie en verf dan die olyfolie met ’n kombuiskwassie aan.

3 Sorg dat die rooster mooi skoongemaak is en smeer dit dan goed met ’n geoliede lappie. Braai die sosaties vir ongeveer 6 minute oor matige kole en draai dit gereeld om.

4 Meng al die bestanddele vir die doopsous saam en sit dit voor saam met die sosaties.